Në përpjekje për të qetësuar mijëra studentë që protestojnë prej tre ditësh para Ministrisë së Arsimit, kryeministri Edi Rama të premten publikoi një video 3D, sipas të cilës planifikohet ndryshimi i gjendjes në godinat e Qytetit Studenti.
Kujtojmë se gjendja në godinat studentore është një nga tre pikat që studentët i kanë parashtruar qeverisë, ndërsa paralajmërojnë se do të rikthehet sërish protesta të shtunën, 8 dhjetor.
Prezantimi në video, ka bërë që qindra komente të “shpërthejnë” kundër tij dhe qeverisë që përfaqëson në rrjetin social Facebook.
Qytetarët i kujtojnë me ironi se në mënyrë 3D janë bërë edhe një sërë veprash të tjera si aeroporti i Kukësit dhe ai i Vlorës.
“O Edi të ka ardhur litari në fyt, të siguroj që të kërkosh azil si Gruevski, pasi nuk ke asgjë në terezi ose do të përfundosh si Gadafi”,- shkruan një qytetar.
Në postimin e dytë të videos në profilin e tij në Facebook, ndryshe nga rasti i parë ku nuk munguan as ironitë, kryeministri Edi Rama nuk u ka kthyer ende përgjigje komentuesve.
