Kryeministri Edi Rama ka publikuar në rrjetin e tij social Facebook foto nga Samiti Botëror për Klimën që po mbahet në Baku Azerbajxhan.
Konferenca vjetore e OKB-së për klimën nisi dje. Në këtë konferencë marrin pjesë liderë botërorë nga rreth 200 vende.
Takimi në Baku pritet të zgjasë deri më 22 nëntor dhe është eventi më i madh që Azerbajxhani ka organizuar deri më sot.
Kryeministri është takuar me kreun e OKB, Antonio Guterres.
Në konferencën dyjavore pritet të adresohen përkushtimet financiare për shtetet e varfra që janë prekur nga valët e të nxehtit, stuhitë dhe vërshimet, pasi intensiteti i tyre është rritur për shkak të ndryshimeve klimatike.
Një pritshmëri kryesore nga COP29 është marrëveshja për një Objektiv të Ri Kolektiv të Kuantifikuar të drejtë dhe ambicioz për financimin e klimës. Nismat e propozuara nga Presidenca e COP29 përfshijnë integrimin e veprimit klimatik me qëllimet e zhvillimit të qëndrueshëm, zhvillimin e korridoreve të energjisë së gjelbër, krijimin e zgjidhjeve të ruajtjes së energjisë së gjelbër, avancimin e hidrogjenit të pastër dhe reduktimin e metanit nga mbetjet organike.
Organizatat joqeveritare shqetësohen se samiti ‘COP29’, do të mbetet në hije nga fitorja e Donald Trump. Pas fitores së tij në zgjedhjet e vitit 2016, ai pati urdhëruar largimin e Shteteve të Bashkuara nga Marrëveshja e Parisit për Klimën.
