Pak minuta më parë kryeministri Edi Rama ka bërë publike një faturë të energjisë elektrike të një shtetasi shqiptar në Itali. Sipas Ramës, shqiptari jeton në Firence dhe përmes një fotoje i ka dërguar atij faturën e cila është rreth 625 euro.
Në mesazhin e tij, shqiptari i tregon kryeministrit Rama se ka një rrogë mujore prej 1500 eurosh.
Ky reagim i kryeministrit vjen pas protestave që po organizohen në vendin tonë kundër rritjes së çmimeve të karburantit por edhe të ushqimeve. Kryeministri ka këmbëngulur se nuk do të heq taksat e naftës dhe ka premtuar se nuk do të ketë rritje të çmimit të energjisë elektrike.
Postimi i kryeministrit:
Ma çon një shqiptar nga Firenze (emrin e të cilit e fshiva edhe pse nuk ma kërkon), me këtë tekst:
“Zoti Kryeministër!
E kotë të luftosh në fejsbuk me ata që një e dy përmendin rrogat tona këtej. Nuk e besova kur ju dëgjova që në Shqipëri nuk e keni rritur faturën e elektricitetit. Po e verifikova dhe ju them që jam pa fjalë! Mos u mërzisni me ata që bëjnë llogaritë e rrogave tona jashtë. Ca nuk kanë, ca nuk dinë ca jane te futur, ruani qetësinë me ta kush nuk e kupton sot do e kuptojë nesër. Ne këtej po na ikën truri me faturat e energjisë. Italianëve edhe më keq se neve që jemi stërvitur ca andej para se të vinim.
Po ju nis faturën e famijes time mund ta tregoni publikisht. Jetojmë në një apartament aspak luksoz me qera këtu me një nga ato rrogat 1500 euro që i shkruajnë komentet sikur janë 15 mijë euro! Kemi tre goca në shkollë. Nuk po i bie gjatë. S’dimë sa do arrimë ta kapim fundin e muajve që vijnë po vazhdoi kjo furtunë çmimesh.. Zoti ju dhëntë durim dhe forcë“, i shkruan shqiptari kryeministrit Rama./Opinion.al
