Sot në rajonin Tiranë – Durrës do të zhvillohen zgjedhjet për delegatë te Kongresit të Partisë Socialiste të Shqipërisë. Do të zgjidhen 168 delegatë për qarkun Tiranë dhe 52 delegatë për qarkun Durrës.
Prej orës 08:00 deri në orën 16:00 qendrat e votimit për zgjedhjet e delegatëve do të qëndrojnë të hapura. Kreu i Partisë Socialiste, Edi Rama, ka votuar paraditen e sotme në njësinë Administrative Dajt, për zgjedhjen e delegatëve të Kongresit.
Kryeministri Rama tha se proceset zgjedhore në PS dhe reformat e ndërmarra janë ato që bëjnë diferencën mes kësaj force politike dhe të tjerëve. Rama tha se Partia Socialiste po rritet numerikisht, por edhe në cilësinë e saj, ndërsa theksoi se kjo parti ka të gjitha kapacitetet e nevojshme për të realizuar reformat e ndërmarra. “Në këto dy muaj në PS janë zhvilluar rreth 5 mijë procese zgjedhore me votë të fshehtë duke pasur parasysh zgjedhjet e kryetarëve në organizata socialiste dhe zgjedhjen e delegateve ne procesin e përfaqësuesve më të lartë të partisë në kongres. Janë procese zgjedhore që bëjnë diferencën mes PS dhe të tjerëve, dhe ndërkohë janë procese zgjedhore që kanë përfshirë një numër të jashtëzakonshëm zgjedhësish. Në një moment transformimi të PS e cila po hapet, po rritet, jo vetëm numerikisht, por edhe në cilësinë e strukturës së saj, duke synuar një reformim cilësor të strukturës, përbërjes sociale të çdo organizate. Jam krenar për PS, dhe shfrytëzoj rastin t’u bëj thirrje të gjithë atyre që dëshirojnë të shohin një orë e parë rezultatet e reformave tona që t’i bashkohen PS, e cila është e vetmja forcë që synon integrimin e Shqipërisë në Drejtimin e duhur. Kjo parti ka të gjitha kapacitetet për të realizuar këtë, përmes procesesh e reformash që të tjerët nuk i morën përsipër as parimisht e jo më t’i vinin në jetë. Nëse reformat tona do ishin marrë më parë, do të ishte rezultate të tjera tani. Me reformat që po bëjmë nuk bëhet fjalë për Shqipërinë e vitit tjetër, por për Shqipërinë e 20 viteve të ardhshme”, tha kryeministri Rama/ Balkanweb
