Kreu i qeverisë, Edi Rama, ka zhvilluar këtë të hënë një takim me disa qytetarë, teksa së bashku me Ministren e Shtetit për Sipërmarrjen dhe Klimën e Biznesit Delinda Ibrahimi, kanë prezantuar projektin pilot për pagesat elektronike.
Gjatë fjalës së tij, ai ka thënë se kjo mënyrë e të blerit ju jep avantazh konsumatorëve edhe bizneseve.
”Konsumatorëve ju jep avantazh. Kjo bën që të mos ketë evazion nga ana e bizneseve për TVSH, plus ka të mirën që s’ka komision, është më e lirë se përdorimi i kartës apo transaksionet që bëhen nëpërmjet bankës”, u shpreh Rama.
Nga ana tjetër ministrja e Shtetit për Sipërmarrjen dhe Klimën e Biznesit, Delina Ibrahimaj, tha se pagesat elektronike do të jenë ndihmesë edhe për bizneset.
”Sot do të fillojë testimi i këtyre pagesave. Janë përzgjedhur 8 kompani, të cilat janë gati për ta testuar. Qëllimi i gjithë projektit është të kuptojmë se çfarë vështirësish mund të kenë individët në përdorimin e këtyre pagesave. Kohët e fundit jemi të gjithë të angazhuar drejt inovacionit. Sot i vetmi transaksion që mund të kryejmë është nëpërmjet kartave që ka një kosto prej 3%, sidomos për bizneset. Kemi dhe si qëllim që të testojmë sistemet që nga Korriku i këtij viti të jenë të gjitha online.
Për individët nuk do të ketë komision, ndërkohë që për bizneset do të jetë shumë më i ulët, pra nëse sot mesatarisht transaksionet e kartave shkojnë nga 2.5 deri në 3% kosto për bizneset, nëpërmjet transaksioneve elektronike, me konkurrencë në rritje, besoj se kjo shifër mund të arrijë tek 0.5%”, tha ajo.
