Në një fjalim solemn duke paralajmëruar një epokë të re për Shqipërinë, kryeministri Rama falenderoi mbështetësit e tij me lot në sy e duke i rënë me grusht tavolinës. Këtë të fundit e bëri duke thënë “Partia Socialiste e Shqipërisë”, për të theksuar edhe më fort vendosmërinë për të vazhduar përpara me 61 bashki të fituara.
“Ju dua shumë fare” i tha ai simpatizantëve të cilët e shoqëruan me duartrokitje dhe ovacione gjithë kohës. Ai u tregua falenderues ndaj gjithë atyre që e kishin ndihmuar gjatë kësaj situate politike duke veçuar bashkëshorten, Gregun dhe Rean.
“Për socialistët për progresistët dhe për simpatizantët e çdo moshe e bindjeje. Që nga ata që s’më lanë kurrë të ndjehem vetëm në përpjekjen time kokëfortë, me mesazhe të panumërta inkurajimi, në zyrën time në Whatsapp. Tek ata që erdhën të më dëgjonin në pikun e vapës gjatë maratonës drejt 30 qershorit. E deri tek ata që sot e mbytën përfundimisht me thonjtë e ngjyrosur në qendrat e votimit fantazmën e dhunës dhe pengmarrës politike të këtij populli, nuk gjej dot fjalë për të përcjellë atë që ndjej. E di se ska se si të mjaftoj po skam se si t’ju a them ndryshe: Ju dua shumë fare.
Kjo është shprehja më e bukur për mua, të cilën, ma thotë Zaho dhe për të cilën unë vdes fare. Faleminderit të gjithëve në mënyrë të posaçme Lindës që mban ditë natë malin e halleve të mija, Gregut, Reas dhe të paepurës Aneta Rama, që sot ishte një nga qindra mijërat thonjtë tuaj të mrekullueshëm. Rroftë Shqipëria, rroftë Shqiptaria, rroftë Partia Socialiste e Shqipërisë” tha Rama.
Por fjalimi i kryeministrit nuk ishte vetëm falenderues. Ai ripërsëriti edhe njëherë atë që tha për rreth një muaj gjatë fushatës. Asnjë grua që punon aktualisht në bashkitë e drejtuara nga opozita nuk do të largohet nga puna ndërsa burrave i merret parasysh aktiviteti në protestat e opozitës.
“Kush kaloi vijën e kuqe të ligjit gjatë revolucionit imagjinar do ndëshkohet. Kush ka zbritur në bulevard si turist paqësor nuk do të preket për të vazhduar punën në ndërmarrjet bashkiake. Asnjë grua nuk do të largohet nga puna në asnjë nga bashkitë e djathta të mandatit që skadoi sot. Asnjë revansh i natyrës politike me administratën nuk tolerohet” tha ndër të tjera Rama. /Opinion.al
