Teksa opozita e ka akuzuar vazhdimisht kryeministrin Edi Rama për shitblerje të votave në zgjedhjet parlamentare të 2017, së fundmi edhe Monika Kryemadhi në “Opinion”, kryeministri Edi Rama është kundëpërgjigjur duke kaluar në rolin e akuzuesit.
Në përgjigje të një komentuesi në fb, Rama ka veçuar LSI, duke u shprehur se po të mos ishte kjo parti nuk do të ekzistonte fenomeni i shitblerjes së votës në nivele serioze.
“Kontestohet një fitore e thellë dhe e pastër e PS sepse një tjetër humbje e thellë dhe epastër po afron për PD dhe simotrën e saj LSI e cila është buruesja dhe mishëruesja e fenomenit të njohur të shitblerjes së votës. Po të mos kishte LSI nuk do të kishte as shitblerje serioze të votës dhe këtë e dinë edhe zogjtë në male, mineralet në verilindje, edhe luanët dhe bibat në Tiranë. Akuzojnë dhe shajnë me libër shtëpie por harrojnë se shqiptarët nuk janë budallenj.Kush i ka marrë për të tillë e ka paguar gjithnjë shtrenjtë që kur ata kanë fituar të drejtën e gjykimit dhe ndëshkimit me votë”.
Rama i bëri të qartë opozitës se tonet kërcënuese nuk e çojnë askund.
“Akuzave të sharjes së fundit i janë shtuar kërcënimet që nxisin dhunë. Dhuna nuk ndryshon dot rrjeëdhën e përcaktuar nga populli me votë, nuk ndryshon dot as shumivën në Kuvend dhe as qeverinë, madje këto të fundit thjesht i forcon. Dhuna dëmton imazhin e Shqipërisë, godet ekonominë dhe dobëson familjet.Opozita po sillet si i mbyturi që të mbyt dhe nuk është qeveria që mbytet por Shqipëria”.
Një mesazh shefi i qeverisë pati edhe për të pakënaqurit nga qeverisja socialiste.
“Çdo shqiptar i mirë që nuk e do këtë qeveri le të mos e harrojë se kur i bashkohet turistëve të opozitarizmit rrugor nuk e bën Shqipërinë më të mirë, por Shqipërisë i bën keq dhe aspak qeverisë”./B.K Opinion.al
