Stadiumi “Arena Kombëtare” ose ish-stadiumi Qemal Stafa po ngrihet dita ditës. Tashmë është e dukshme kulla në majë të tij, por punimet kanë ecur edhe për impiantin.
Kryeministri Edi Rama në një intervistë për emisionin “Exclusive” në TCH ka thënë se vepra të kësaj natyre janë historike dhe se nuk po e bën për një grusht votash. Ai po ashtu pretendon tu mbyllë gojën kritikëve.
Rama: “Gjithnjë kam dashur që të bëj ndryshime. Kam dashur të sjell gjëra të reja, të ndërtoj gjëra të reja dhe aty ku ka qenë e mundur edhe të guxojmë më shumë, falë edhe arkitektëve të njohur që kemi bashkëpunuar. Pyetja është, ky stadium i ri që po ndërtohet, është më i bukur? A është më në harmoni me Tiranën që kemi? Unë jam i bindur që kur stadiumi të hapë dyert, të gjithë ata që e kanë kundërshtuar, në ratin më të mirë do të heshtin, në rastin më të keq do të thonë, “jo po që s’e kishim me këtë, jo s’e kishim me atë”.
A po ndërtohet kjo vepër për “një grusht votash”?
Rama: “Veprat që i mbeten qyteteve, apo historisë së tyre nuk mund të jenë të lidhura me zgjedhjet. Mund të qëllojë të realizohen para zgjedhjeve dhe të japin efektin e tyre, por s’e besoj që shqiptarët e lidhin votën e tyre me një vepër këtu, apo atje. Shqiptarët janë shumë më të mençur nga sa i kujtojnë politikanët, apo gazetarët”, shtoi ai.
