Kryeministri Edi Rama ka mbledhur sot në Ministrinë e Brendshme gjithë strukturat drejtuese të Policisë së Shtetit dhe po mban fjalin për Emiljano Nuhun, ish-oficerin që denoncoi djalin e deputetit të PS, Rraja.
“Ai (Nuhu) horollisi gjithë dynjanë. Skena të fantazuara nga shpifësi me uniformë. E tërë skena që ngriti atë dallgë balte mbi policinë ishte sajesë fund e krye. Kamerat e komisariatit të Fushë-Krujës tregojnë se shpifësi nuk ka qenë aty, deputetët me armë jo e jo. U la gjithë Shqipëria të përpëlitej në atë vorbull se me demek i kanë vënë armën në kokë një punonjësi të policisë së shtetit”, tha Rama.
Pjesë nga deklarata e Kryeministrit:
Sot djali i deputetit është aty ku e ka çuar drejtësia, jo aty ku dje do ta kishte lënë partia. Ku ishte drejtori i SHÇBA kur shpifësi me uniformë e solli me shkrim shpifjen e tij? Pse nuk u veprua menjëherë për të bërë kontrollin e plotë kur letra u bë publike? Pse iu la një shpifësie tërë koha që të krijonte një vorbull pasi kishte hedhur shpifjen në kazanin e duhur dhe ia kishte mbathur.
Kujt ia kishte borxh kjo trupë njerëzish, mosreagimin me kohë dhe me qartësi të SHÇBA ndaj agresionit që iu bë Policisë së Shtetit. Pse iu mohua publikut shqiptar e drejta për të parë të vërtetën në kamerat e komisariatit. Lidhur me të gjithë skenën e fantazuar, në pamjet e kamerave del qartë se e gjithë skena është një sajesë e tij fund e krye.
Fakti është që kamerat iu dërguan Prokurorisë, po nuk e justifikon gjithë atë baltë që mori Policia e Shtetit. U la gjithë Shqipëria të përpëlitej në vorbullën e një fantazie, me deputetë të armatosur që futen në komisariat. E vërteta në krahun e Policisë së Shtetit, dhe Policia e Shtetit që rri dhe pret të reagojë. Po unë s’mund ta pranoj dot që një jashtënxjerrje kaq e fëlliqur mbi policinë të marrë dhenë, nuk u jepet publikut po thjesht çohet në Prokurori”, tha Rama.
