Posterat e vendosura në kuadër të fushatës elektorale të zgjedhjeve të 14 Majit kanë qenë një ndër çështjet për të cilat është pyetur kryeministri Edi Rama në daljen për mediat pas mbledhjes së Kryesisë së PS-së.
Teksa komentoi banerin e Këlliçit me dy gishtat e mesit të ngritura lart, Rama është shprehur se është një lloj ofendimi për votuesit që të merren në konsideratë individë që sipas tij, përtej dëftesave të shkollës që i mungojnë janë në dispozicion si kukulla, për Berishën dhe Metën, të cilët ai i konsideron zorrë qorre.
“Nuk kam asnjë koment sepse është humbje kohe edhe është vërtetë një lloj ofendimi për votuesit që të merren në konsideratë individë që përtej të gjithave, përtej dëftesave të shkollës që i mungojnë, përtej gishtave të mesit që i ngatërrojnë nuk e di se me cilin mision, nuk më bëjnë shumë përshtypje sepse këta njerëz kanë një problem shumë më të madh: Janë vënë në dispozicion si parfum, si kukulla, si maska për zorrën qorre. Jo për një zorrë qorre që përfaqëson thjesht një alternativë të kalbur, por është një apendicit në trupin e Shqipërisë. Kjo është gjëja më e rëndë. Mund të mos kesh dëftesë, punë e madhe shumë. Mund ta kesh ngresh edhe gishtin e mesit në një moment. Këto janë gjëra që kalojnë. Por t’i japësh fytyrën surretërve të së shkuarës, që janë në sheshin e betejës për të marrë peng të ardhmen e vendit për inatet e tyre personale, jo është e patolerueshme”, deklaroi kryeministri.
