Kryeministri Rama gjatë fjalimit të sotëm në Parlament është ndalur në shifrat e publikuara nga Banka Botërore që tregojnë performancën e ekonomisë së vendit në vitin e fundit.
Sipas tij rritja ekonomike ka qenë me ritme të larta gjatë tre muajve të parë të vitit. Ai ka shtuar se qeveria parashikon uljen e borxhit.
Kreu i qeverisë ka theksuar se shifrat e Bankës Botërore janë konkrete dhe nuk lexohen sipas karrieges ku jeni ulur.
“Njerëzit ju duhen të pandriçuar në mënyrë që t’i bëjnë mish për topat e ambicieve të tyre. Dua të flas për një ligj të rëndësishme që kemi sot këtu, për kujdesin shoqëror, dhe nuk dua të humbas kohën e askujt, e aq më pak të shpenzoj timen, për çka u debatua pak më parë, se është mes atyre që tregojnë përralla dhe atyre që flasin me ekspertizë. Përrallën e koncesioneve në shëndetësi tregojeni sa të doni, nuk ju beson asnjeri, se e vërteta është ajo që qytetarët provojnë dhe që është shumë e thjeshtë.
Qytetarët marrin shërbime shumë më cilësore, dhe nuk paguajnë asnjë qindarkë nga xhepi. Ne kemi bërë dhe do të vazhdojmë të bëjmë partneritete publik-privat për të gjitha shërbimet. Dhe nuk do të humbasim më kohë për t’u mbushur mendjen atyre që shqiptarët i duan të pandriçuar lidhur me këtë çështje. Tani po vij tek tema qendrore sipas meje, dhe nuk po flas me çfarë themi ne, por me çfarë thotë BB për ekonominë shqiptare.
Ekonomia jonë ka filluar të zgjerohet në 2016 mbështetur nga investimet e fuqishme private, dhe rimëkëmbja e konsumit familjar. E thotë BB. Rritja e përshpejtuar me 3 % në tremujorin e parë 2016 vazhdoi me një rritje 3.2 % në tremujorin e dytë. Borxhi publik pritet të bjerë në përputhje me programin e qeverisë për rënie të vazhdueshme të tij. ekonomia rritet duke bërë reformat që po bëjmë ne. Tregu i punës ka shënuar një rritje pozitive. Por ne shifrat i lexojmë sipas karriges ku jemi ulur”, tha kryeministri Rama.
