Kryeministri Edi Rama, në një takim me qytetarët në Fier, tha se qeveria do të përpiqet që bonusin e fundvitit pensionistët ta marrin në fillim të Dhjetorit.
Kreu i qeverisë u ndal edhe te taksa e jashtëzakonshme që do të vendoset për prodhuesit e energjisë, për të cilën tha se do të vendoset në dispozicion të përpjekjes për të përballuar krizën e shkaktuar nga lufta në Ukrainë.
“Do vëmë tatimin e jashtëzakonshëm për prodhuesit e mëdhenj të energjisë, jo për ato të vogla, 3 prodhues ka të mëdhenj energjie në Shqipëri që e eksportojnë energjinë dhe e shesin me çmime stratosferike sepse ky është tregu dhe askush nuk ju thotë as pse as plaç. Por ama do paguajnë më shumë dhe do t’ju vëmë një taksë të jashtëzakonshme që nuk e kemi shpikur ne, e kanë vënë vende të tjera të BE. Ato para që do të marrim prej tyre që nuk llogariten të pakonsiderueshme nuk do i marrim t’i çojmë asgjë tjetër përveç se për t’ua kthyer njerëzve në formën e mbështetjes, duke filluar nga pensionistët. Do vendosim, pavarësisht se çfarë situate është dhe çfarë vështirësish ka buxheti, bonusin e veçantë pensionistëve para Vitit të Ri, këtë herë do bëjmë çmos që ta marrin në fillim të Dhjetorit dhe në buxhetin tjetër edhe nga taksa e jashtëzakonshme çfarë do marrim, përsëri do ta vendosim në dispozicion të kësaj përpjekje të përbashkët që t’i qëndrojmë edhe kësaj vale të tretë që nuk na u ndanë këto dhe të dalim më të fortë siç dolëm nga tërmeti, siç dolëm nga pandemia edhe nga kjo”, deklaroi Rama.
