Në çdo moment regjia e aktivitetit për “Bashkinë që duam” në Tiranë u mundua të tregonte pjesëmarrjen, ndërsa Erion Veliaj tha se në Sheshin “Nënë Tereza” ishin 100 mijë njerëz.
Duke e cilësuar punën e Veliajt në Tiranë, si sukses, kryeministri Edi Rama sulmoi opozitën teksa tha se vendimi i tyre për të djegur mandatet nuk do t’i ndalë.
“PD-ja si sheshi i vjetër në qendër, LSI-ja si shatërvani që ishte këtu në shesh, të tjetër të quajtur “aleatët”, si kioskat që u shtuan vit pas viti dhe zinin sytë e njerëzve. Ata nuk i kemi më përballë, i kemi prapa. Kush nuk e kupton, ose nuk ka dalë nga nata e tyre, ose e kanë harruar kur ata kishin në dorë Shqipërinë dhe Tiranën. Dita jonë do të jetë shumë e mirë, padiskutim shumë më e mirë”, tha Rama.
Duke folur për punën që është bërë në Tiranë dhe atë që pritet të bëhet kryeminsitri u ndal dhe tek Teatri. Sipas tij Teatri Kombëtar do të shembet dhe do të ndërtohet një i ri.
“Do ta ndërtojmë me se s’bën dhe për turpin e gjithë atyre që e kanë baltosur pa lindur projektin, do ta bëjmë Teatrin e ri Kombëtar një kryevepër, të konfirmuar ndëkombëtarisht si “Qemal Stafën” e vjetër, Arenën e re Kombëtare, që shumë shpejt do të jetë stadiumi i futbollit modern, i bukur, i denjë. Po njësoj do ta rilindim edhe Piramidën, do t’i kushtohet të rinjve për një program fantastik edukativ, zhvillimor”./Opinion.al
