Nuk dihet nëse ka pasur ndonjë problem teknik apo kryeministri Rama ka qenë i lodhur nga përzgjedhja e kandidatëve për deputet gjatë mbrëmjes së djeshme, por si jo zakonisht këtë të dielë Rama ka vendosur të mos dalë në Komunikimin Javor por në vend të këtij komunikimi të lerë një shënim në profilin e tij në fb ku ka theksuar se në rast se Partia Demokratike nuk bën kthesë në 48 orën në vazhdim që janë edhe afati i fundit për të hyrë në zgjedhje, atëherë kjo parti do të jetë një kujtim i së shkuarës.
Shënimi i plotë
SHËNIMI I DITËS
(në vend të Komunikimit të Javës)
Mbrëmë kemi regjistruar skuadrën e re përfaqësuese të Partisë Socialiste. Jemi plotësisht gati të nisim finalen e madhe të këtij mandati dhe hapim një kapitull të ri për Shqipërinë që duam. Me forca të ripërtërira. Me më shumë eksperiencë. Më shumë gjak të ri. Me vendosmëri ende më të madhe se katër vjet më parë.
Por ndryshe nga katër vjet më parë, kemi përballë jo një qeveri të diskredituar, po një opozitë të konsumuar. Të njëjtët njerëz që e çuan Shqipërinë në rrugën e rrënimit, po e çojnë Partinë Demokratike në rrugën e asgjesimit.
Unë vazhdoj ta kem thuajse bindje se Partia Demokratike do të ndalet mu në buzë të humnerës dhe do të kthehet për të hyrë në zgjedhje. Kudo ku ka marrë një gjë në dorë, Lulëzim Basha ka bërë një dëm të madh dhe kjo është e vetmja arsye që ma bën bindjen të paplotë.
Sot do të doja ta shpjegoja këtë gjatë Komunikimit Javor, por vendosa të mos e bëj. Dua ta lë Lulëzim Bashën të qetë në këto 48 orë të fundit, të cilat vendosin nëse Partia Demokratike do të marrë kthesën e shpëtimit apo do të tretet në humnerën e vetëshkatërrimit.
Mbetem natyrisht i gatshëm ta pres kryetarin e PD-së në çdo moment, për të negociuar rikthimin e partisë së tij në fushën e betejës demokratike të 18 qershorit. Përndryshe Partia Demokratike kështu siç e njohim, do të jetë më shpejt se vonë një kujtim i së kaluarës.
