Edi Rama thotë se opozita nëse vazhdon në këtë rrugë do të izolohet nga ndërkombëtarët. Në mbledhjen e grupit të PS-së, kryeministri tha se në Evropë dhe në SHBA nuk ka asnjë njeri që beson opozitën.
“Nuk ka mbetur më njeri në Evropë e SHBA, që të besojnë katran- prodhuesit tanë, që kanë shpërndarë baltë në zyrat e Evropës më shumë seç kanë shpërndarë armiqtë tanë”, tha Rama, që sipas tij edhe me djegien e mandateve ata kanë marrë vetëm refuzim.
Kryeministri po ashtu paralajmëroi sërish opozitën se kush ngre dorë ndaj zgjedhjeve do të dënohet sipas kodit penal.
“Edhe me djegien e mandateve kanë marrë vetëm refuzimin, po vazhduan kështu do të marrin dhe izolimin total nga gjithë bota demokratike. Kujtojnë se do ngrenë njerëz për të djegur institucionet, për të prodhuar dhe dëshmorë për kauzën e tyre. I gënjen mendja se do të ndalojnë Shqipërinë të bëjë zgjidhje në datën e caktuar në bazë të Kushtetutës, por nuk kanë gjetur asnjë budalla nëpër botë që jo t’i mbështesë por t’i kuptojë, nuk do gjej asnjë që t’i takojë e jo më t’i dëgjojë”, tha Rama.
Sipas tij në demokraci askush nuk është i detyruar të futet në zgjedhje dhe nuk është detyra e qeverisë të fusë në zgjedhje partitë që s’duan të futen në zgjedhje./Opinion.al
