Kryeministri Edi Rama ka ftuar përmes komunikimit javor në “Facebook” Partinë Demokratike që të rishikojë edhe njëherë vendimin e saj për të mos marrë pjesë në zgjedhjet e pjesshme që do të mbahen në Kavajë më datë 5 maj pas shkarkimit nga detyra të Elvis Rroshit. Ndërkohë që Rama ftoi opozitën të dialogojë për reformën zgjedhore dhe të votojë vetingun, ndërkohë që duhet ta harrojë qeverinë teknike, në mendimin e tij…
“Bujrum të dialogojmë dhe të votojmë së bashku çdo ndryshim që forcon ligjin e zgjedhjeve vetëm të dialogojmë për gjithçka që mund të dialogojmë. Por qëndrimi im është dhe mbetet i pandryshuar, PD duhet ta harrojë qeverinë teknike dhe shtyrjen e datës së zgjedhjeve.
Sidoqoftë, kriza e thellë e PD as nuk është dhe as nuk do të bëhet krizë e vendit. Me apo pa PD, populli duhet dhe do të zgjedhë i lirë në ditën e sovranitetit të tij të pakundërshtueshëm, qoftë në zgjedhjet për kryetarin e bashkisë së Kavajës, qoftë në zgjedhjet për Parlamentin e ri për katër vitet e ardhshme.
Shqipëria që duam është aspirata jonë dhe amaneti i atyre që luftuan për kombin tonë ndër shekuj.
Jemi gati të dialogojmë por askush nuk na imponon dot avazet e vjetra. E ardhmja vendoset në 18 qershor, për fatin e të ardhmes.
Vetëm populli mund dhe do ta vendosë atë me votë. Një rrugë që anashkalon popullin nuk hapet. Për Shqipërinë që duam do të bëjmë gjithçka duam”, u shpreh Rama.
Ai theksoi se përpara zgjedhjev të 18 qershorit janë ato lokale të Kavajës, të cilat gjithashtu do të zhvillohen edhe nëse PD nuk do të marrë pjesë. Rama i kërkoi demokratëve të reflektojnë pasi këtë qytetet e kanë qeverisur për 21 vite, ndonëse me bilanc të dobët.
“Presidenti dekretoi zgjedhjet e parakohshme të Kavajës. Projekti transformues i Kavajës duhet dhe do të zhvillojë. PD ka deklaruar se nuk do hyjë në zgjedhjet e 7 majit në qytetin që ajo qeverisi me një bilanc katastrofik për 21 vjet me radhë. Uroj të mendohen dhe shpresoj të mos i lënë demokratët e thjeshtë pa alternativën e tyre“,-tha Rama.
