Në një dalje nga Kryesia e Kuvendit, Kryeministri Rama ka shpjeguar ndryshimet kushtetuese, të miratuara së fundi nga komisioni i ligjeve dhe të kontestuara nga opozita jashtëparlamentare.
I pyetur nga gazetarët lidhur me deklaratën e bërë nga Zv.kryetari i Grupit të CDU-CSU në Bundestagun gjerman, Johann Wadephul, se ndryshimet kushtetuese mund të sjellin pasoja në procesin e anëtarësimit të Shqipërisë në BE, Rama tha:
“Në planin etik ishte zhgënjyer se nuk flitet me të dëgjuar, por me fakte të verifikuara. Ai nuk e ka sajuar por e ka dëgjuar që nisma ndalon koalicionet. Kjo është e pavërtetë. Koalicionet nuk ndalohen, ato thjesht duhet dhe do të jenë si në çdo vend të Europës, ku partitë kanë të drejtë të grupohen e të paraqesin kandidatët e tyre, siç bën CDU me simotrën CSU. Në planin politik ekuilibri është i zhbalancuar, sepse mban krahun e opozitës jashtëparlamentare. Tani unë dua të merrem me thelbin. Më vjen keq për faktin që në deklarimin e djeshëm flitet deri në pikëpyetje të persepektivës europiane të Shqipërisë. Ndërkohë që qoftë Bundestagu qoftë Këshilli u Europës nuk i kanë vënë kusht Shqipërisë të bëjë të lumtur Lulzim Bashën dhe as të bëjë marrëveshje jashtë parlamentit me partitë që e braktisën atë. Bundestagu dhe KE më pas i kanë kërkuar Shqipërisë: Miratimin e një reforme elektorale bazuar në rekomandimet e OSBE ODIHR. Kjo është kërkesa për Shqipërinë. Shqipëria nuk duhet gjykuar mbi anësitë politike dhe mbi bazën e fjalëve, por do të gjykohet mbi bazën e fakteve. Ne e pritëm në pafundësi opozitën jashtëparlemtare të tryezë gjë që e shtyu shumë procesin. Dhe në fund bëmë edhe një marëveshje me të, duke i dhënë gjithçka kërkoi. Edhe përtej dëshirës sonë. Ne nuk donim që përsëri Shqipëria të mos depolitizonte administratën zgjedhore. Ne e shpërfillëm rekomandimin bazë të OSBE/ODIHR, që është depolitizimi i administratës zgjedhore. Unë nuk pendohem dhe nuk do pendohem për këtë, por faktet janë të rëndësishme.”. /Opinion.al
