Raporti paraprak i Komisionit të Venecias ka konfirmuar se zhvillimi i zgjedhjeve të 30 qershorit ka qenë vendimi i duhur sipas kryeministrit Rama.
Në një intervistë televizive Rama tha se nuk do të komentojë ato që thuhen në raportin paraprak të Venecias. Ai theksoi se kjo është një punë që i takon komisionit të posaçëm por nënvizoi se opinioni i Komisionit të Venecias konfirmoi qëndrimin e tij se asnjë parti nuk mund të marrë peng zgjedhjet dhe se zhvillimi i tyre ishte vendimi më i mirë.
“Nuk kam asnjë qëndrim për këtë sepse është një çështje që i takon komisionit të posaçëm dhe ka të gjithë kompetencën për të gjykuar mbi shkeljen e bërë dhe për të konstatuar peshën e kësaj shkelje. Në fund nuk do të jetë një qëndrim politik, por i formësuar mbi gjykimin e atyre që e dinë këtë punë më mirë se ne të dy. Nuk është më puna ime, qëndrimet i kam mbajtur kur ndodhi shkelja dhe për mua tani është shumë e rëndësishme që komisioni i Venecias është shprehur, sikur unë shprehja në mënyrë të përsëritur më pyesnit si do të bëhen zgjedhje me një parti dhe u thosha asnjë parti apo një grup nuk mund të marrin peng zgjedhjet. Këtë Venecia e ka thënë e zeza mbi të bardhë dhe nuk ka asnjë diskutim se shkuarja në zgjedhje ka qenë vendim i duhur dhe se zgjedhjet janë plotësisht legjitime” tha Rama.
Sa i përket shkarkimit të Presidentit Meta bazuar në opinionin raportin paraprak të Venecia, Rama u përgjigj duke thënë se nuk ka kohë të merret me fatin e Ilir Metës.
“Përgjigja ime është e thjeshtë dhe e qartë, është krijuar një komision që ka në përbërje njerëz të ligjit, që dinë të zbërthejnë të gjithë materien nga pikëpamja ligjore dhe ata do të na bëjnë ne sugjerimin e tyre si parlament dhe ne do të marrim vendimin tonë. Nuk kam asnjë minutë për t’u marrë me fatin e Ilir Metës”. deklaroi kryeministri.
Kryeministri u pyet edhe për një këshillë për Metën në lidhje me deklaratën e këtij të fundit se nëse Venecia deklaronte se ka shkelur Kushtetutën do të jepte dorëheqjen.
“Asnjë” u përgjigj Rama. /Opinion.al
