Kur duhet edhe disa orë që Parlamenti Europian të votojë në tërësi amendamentin e PPE për 15 kushtet e Shqipërisë për çeljen e negociatave, kryeministri Rama ka reaguar duke u shprehur se nuk ka 15 kushte.
Në një reagim në Twitter, Rama shkruan se nuk ka 15 kushte për uljen në tryezë me BE dhe se kjo po përdoret për politikë.
“Po mirë, kur paska 15 kushte për nisjen formale të negociatave për anëtarësim, për çfarë duhej kjo rezoluta e partive aleate të PD në Parlamentin Europian që u votua pa konsensus? E pra, nuk ka 15 kushte për uljen në tryezë me BE, sepse 7X7 s’bëjnë 42 në asnjë vend të botës!
Dhe nëse pastaj kjo 15-ta duhet për politikë e prandaj bashkohen kushtet e fillimit me ato të vijimit, atëherë nuk janë 15 po janë 15X100 kushte më shumë për t’u plotësuar deri ditën e anëtarësimit! Po një gjë është e sigurtë: Këta që kapen pas kësaj 15-ës do mbeten në opozitë”, shkruan Rama në Twitter.
Votimi i kryer mbrëmë në mesnatë në Parlamentin Europian për zbatimin e 15 kushteve për Shqipërinë para nisjes së negociatave pritet të finalizohet edhe nga ana proceduriale brenda pasdites së sotme.
Votimi i mbrëmshëm i amendamntit të PPE, ishte votim në parim, që shpreh vullnetin e shumicës në Parlament për të pranuar amendamentin. Në orën 18-19 pritet të nisë votimi final në tërësi, i cili përfshin edhe amendamentin për Shqipërinë.
Në amendament thuhet se; “Parlamenti Europian thekson 15 kushtet e caktuara nga Këshilli i Bashkimit Europian që Shqipëria duhet të ketë përmbushur përpara thirrjes Konferencës Ndërqeveritare të parë me shtetet antare”
Këto kushte u vendosën nga Këshilli Europian (shtetet anëtare) me propozimin e Gjermanisë, Francës, Hollandës, Danimarkës e Spanjës në mars të këtij viti. /Opinion.al
