Pas ftesës për opozitën për tu ulur në tavolinën e Komisionit të Reformës Zgjedhore, kryeministri Rama ka udhëtuar drejt Barit.
Ai do të marrë pjesë ditën e nesërme në forumin “Ekonomia Blu në Mesdhe, dhe Mundësia për Bashkëpunim” të organizuar nga Rajoni i Pulias në “Fiera del Levante”.
Rama është pritur në aeroportin e Barit nga Presidenti i Rajonit të Pulias Michele Emiliano i cili është një nga organizatorët e eventit. Rajoni i Pulias është gjithashtu aksioneri kryesor i kompanisë italiane që ka kërkuar të menaxhojë aeroportin e Vlorës.
Dy ditë më parë Corriere del Mezziogiorno raportoi se shoqëria italiane “Aeroporti di Puglia” kërkon të menaxhojë aeroportin e Vlorës.
“Kërkesa për shprehjen e interesit është dërguar në Shqipëri. Një përgjigje paraprake mund të vijë të mërkurën e ardhshme nga Fiera del Levante në rast të një takimi me atë që ka të drejtë të japë dritën jeshile, kryeministrin Edi Rama” shkruan media italiane.
‘Aeroporti di Puglia’ menaxhon për momentin katër aeroporte në rajonin e Pulias në Itali. Pjesa më e madhe e aksioneve të saj zotërohet nga rajoni administrativ i Pulias (99.41%).
Rama prezantoi projektin e aeroportit të Vlorës dy ditë më parë dhe tha se oferatat për menaxhimin e tij janë duke u vlerësuar. Sipas Corriere del Mezziogiorno shoqëria italiane po përpiqet të ndërkombëtarizohet dhe për këtë arsye ka nënshkruar një kontratë me një grup bankash për një kredi deri në 65 milionë euro. Forumi ku Rama do të flasë nesër në orën 10:30 është një nga kryesorët e rajonit të Pulias për të promovuar bizneset e tyre. /Opinion.al
