Të shtunën, më 14 qershor, Huma Abedin dhe Alex Soros kurorëzuan dashurinë e tyre në një aheng madhështor. Dasma “mbretërore” u zhvillua te shtëpia e çiftit në Water Mill, në New York.
Një dasmë që u bë qendër e vëmendjes për ditë të tëra.
Strategia politike, autorja dhe ndihmësja e Hillary Clinton dhe investitori dhe filantropi Alex Soros u takuan për herë të parë në një festë të organizuar nga miqtë e tyre James dhe Nicky Hilton Rothschild. Një festë e rastësishme, një shikim, një bisedë dhe papritur kuptuan si “ishin bërë për njëri-tjetrin”.
Në qershor 2024, ata u fejuan pasi Soros i propozoi Abedin me një unazë diamanti me prerje smeraldi. Pas fejesës, radhën e kishte martesa! Dhe jo një dasmë dosido, një dasmë madhështore e kuruar deri në detaje dhe që arriti vlera marramendëse.
Çifti mbajti dy ceremoni gjatë fundjavës. Të premten, pati një shërbim intim në shtëpinë e babait të Sorosit në Southampton me familjen dhe miqtë, për të nënshkruar nikah-un në nder të besimit mysliman të Abedinit dhe ketubah-un në nder të trashëgimisë hebraike të Sorosit.
Për këtë ceremoni të veçantë, nusja veshi një fustan të lehtë me dantella të personalizuar nga Erdem. Ky shërbim u pasua nga një drekë për familjen dhe miqtë e ngushtë, në të cilën nusja veshi një fustan Oscar de la Renta të zbukuruar me motive lulesh.
Të shtunën, një festë më e madhe u zhvillua në shtëpinë e çiftit aty pranë, për të cilën nusja veshi një fustan të personalizuar Givenchy nga Sarah Burton, të frymëzuar nga Audrey Hepburn. Pamja me supe zbuluar paraqiste një rrip delikat dhe një rresht me kopsa të mbuluara përgjatë shpinës, ndërsa inicialet e çiftit ishin përfshirë në qëndisjen e ndërlikuar të degës së ullirit në pëlhurën krep me mëndafsh ngjyrë fildishi dhe saten të mbështetur.
Dasma e shumë përfolur e Alex Soros, bëri bashkë shumë personazhe të njohur, VIP, nga bota e artit politikës edhe më gjerë. Në radhët e të pranishmëve dhe të ftuarve specialë, ishte edhe kryeministri i Shqipërisë, Edi Rama.
Revista prestigjioze “Vogue” , jep me detaje gjithçka ka ndodhur brenda dasmës më të përfolur të vitit. Në fotot e përzgjedhura është edhe fotoja e kryeministrit Rama, i cili pozon i buzëqeshur, duke i hedhur krahun supeve dhëndrit, Alex Soros.
S’kishte se si të ndodhte ndryshe, sipas asaj që shkruan revista, kryeministri Rama gjatë banketit, ngriti dhe një dolli urimi për çiftin.
“Gjatë gjithë vaktit, u ngritën dolli nga djali i Abedinit, Jordan; vëllai i madh i Alexit, Jonathan Soros; kryeministri i Shqipërisë, Edi Rama; Anna Wintour (me pak ndihmë nga Jimmy Fallon); James Rothschild, i cili shërbeu si shoqëruesi jozyrtar i dhëndrit; dhe Daniel Sachs”, shkruan revista.
Fillimisht, Abedin dhe Alex Soros kishin menduar ta kurorëzonin lidhjen e tyre në mënyrë diskrete, larg syve të publikut. Por gjithçka ndryshoi gjatë një feste fejese të organizuar me shumë kujdes nga një person mjaft i njohur për të dy: Hillary Clinton, ish-Zonja e Parë, ish-Sekretare Shteti dhe njëkohësisht mentorja e hershme e Abedin. Huma Abedin kishte filluar të punonte me të që në moshën 19-vjeçare, si praktikante në Departamentin e Shtetit, ndërsa studionte në Universitetin George Washington.
Nga ana tjetër, Alex Soros, 39 vjeç, po shndërrohet gjithnjë e më shumë në një figurë kyçe të politikës progresiste globale. Me një doktoratë në histori dhe një profil publik gjithnjë e më të dukshëm, ai ka marrë drejtimin e perandorisë filantropike të themeluar nga i ati, George Soros, sot 94 vjeç./tvklan.al
