Si çdo ditë proteste shefi i qeverisë Edi Rama largohet nga Tirana. Këtë të diel, ai ka qenë në Lezhë për të hapur fushatën në këtë qytet kur për PS-në kandidon, ish deputeti Pjerin Ndreu.
Fjalimi i Ramës nga Lezha, ishte Copy paste i fjalimit të së shtunës ku u hap dhe fushata në Tiranë. Kryeministri edhe njëherë akuzoi opozitën se sipas tij kërcënon me konflikt civil pasi ka frikë nga humbja e zgjedhjeve.
“Është një betejë mes të shkuarës dhe të ardhmes. Mes nesh dhe atyre që duan ta kthejnë pas këtë vend përsëri, me baltë, me sherr dhe konflikt. Mes nesh që duam një vend normal demokratik, duam t’ju lëmë fëmijëve tanë një vend të denjë dhe atyre që duan vetëm pushtet. Pushtet për vete përmes dhunimit të demokracisë. Ata kanë frikë nga zgjedhjet, kanë frikë të vijnë përpara popullit dhe të pranojnë gjykimin e njerëzve me votë. Ndaj kërcënojnë se nuk do ta lënë popullin të shprehet me votë. Kanë frikë nga ballafaqimi ndaj përbetohen rrugëve se do të na imponojnë një përplasje”, tha Rama, ndërsa në këtë takim mungonin flamujt e PS, që ishin zëvendësuar me flamurin kombëtar.
Sipas tij opozita nuk ka asgjë në dorë, përveç ikjes së tyre në drejtim të paditur.
“Janë të alarmuar nga reforma në drejtësi, nuk e kanë dashur që ditën e parë. Nuk e duan dhe sot, por sot ndryshe nga dita e parë e dinë që nuk e ndalin dot. Paniku i shtyn në një rrugë që vetëm kokën e tyre do të thyejnë, por Shqipërisë dhe shqiptarëve nuk iu bëjnë dot asgjë”, theksoi më tej Rama. / Opinion.al
