Në një takim të zhvilluar sot në Kamëz, kryeministri Edi Rama është ndalur te infrastruktura në shkolla.
Gjatë fjalës së tij, Rama tha se kur jetonte në Paris shkonte te një shkollë që kishte afër ku luante basketboll dhe që sipas tij as që i afrohej shkollës në Kamëz.
Kreu i qeverisë gjithashtu shtoi se ka nevojë për përmirësimin e sistemit arsimor që të krijohen kushtet që i gjithë procesi i mësimdhënies të ngrihet vit pas viti në nivel.
“Pra do t’i marrim ne përsipër pagesën për sigurimet shëndetësore e shoqërore. Rritja e mundësive është një domozdoshmëri për të rritur edhe kapacitetet. Dua të nënvizoj që e thashë edhe më parë në një takim me të rinjtë, pavarësisht se në këtë komunikim intensiv nuk kemi folur për vota dhe për zgjedhje. Këtu është shembulli më konkret dhe ulëritës. Kush thotë që vota nuk ka rëndësi, bën një gabim shumë të madh. Është pikërisht vota që vendos se si shkojnë punët. Është budallallëk ajo fjalia që të gjithë janë njësoj. Shikoni shkollat në Kamëz. Unë në Paris, aty ku jetoja kisha afër një gjimnaz që luaja basketboll në palestër dhe ajo jo vetëm nuk ishte më e mirë se kjo këtu po nuk i afrohej kësaj shkolle këtu. Pa folur për kopshte e për çerdhe që këtu as që bëhet fjalë. Pra vota ka shkuar siç duhet. Të thuash që nuk votoj sepse nuk ka pikë rëndësie, është një gabim shumë i madh. Nuk ka asnjë zgjidhje ideale, por siç është sot situate e shkollave në Kamëz, është e gjithë Shqipëria. E pakrahasueshme me nga atje ku u nisëm. Na duhen edhe shumë energji akoma për të vendosur një sistem energjie brenda për të funksionuar siç duhet. Patjetër na duhet që të krijojmë kushtet që i gjithë procesi i mësimdhënies të ngrihet vit pas viti në nivel. Përmbajtja brenda shkollave që janë në nivel European, nuk është aty ku duhet”, u shpreh Rama.
