Kryeministri Edi Rama ndodhet pasditen e sotme në qytetin e Gramshit, ku po zhvillon një takim me banorët e zonës.
Në fjalën e tij, kryesocialisti u ndal te turizmi, ku u shpreh se njerëzit kanë filluar ta vizitojnë këtë qytet. Rama u bëri thirrje të gjithë atyre që duan të investojnë në këtë zonë dhe u premtoi mbështetje nga qeveria.
Pjesë nga fjala e Ramës:
Më vjen mirë të jem sot me ju dhe që ju shoh të gjithëve bashkë. Është një pamje shumë e bukur dhe ka një rëndësi të madhe ky moment bashkimi, ky moment uniteti të cilin duhet ta shtrijmë në çdo komunitet sepse më 11 maj patjetër që do të votoni dhe e dimë që Gramshi është një bashki me shumë potencial, por me pak mundësi nga pikëpamja e buxhetit të vetë.
Ne po e shohim sesi Gramshi ka filluar të vizitohet. Pra ajo perdja hekurt që kishte rënë mes Gramshit dhe pjesës tjetër të Shqipërisë ra me rrugën e re, u bë lidhja e shpejtë dhe në ndërkohë për shumë njerëz që nuk e kishin marrë deri këtu, bukuritë e zonës kanë filluar të zbulohen.
Ajo që ne do të bëjmë është të nxisim, mbështesim dhe të jemi në krah të çdokujt që do të investojë në këto territore të bukura për të hapur dyer të tjera mikpritjeje.
Nga ana tjetër nuk e di a e keni ndjekur, ne kemi ndërmarrë një hap tjetër për rilindjen e industrisë tonë ushtarake. Dhe në Gramsh ka një histori, një traditë dhe kemi nisur të diskutojmë me kompani për nisjen e prodhimit dhe punësuar me paga shumë të mira, do ta bëjmë realitet më herët sesa vonë.
