Kryeministri Edi Rama deklaroi se Ballkani Perëndimor do të jetë më i godituri për shkak të pandemisë së koronavirusit, ndërsa shprehu bindjen se ky rajon ka potencialin për t’u çliruar dhe për të ecur përpara.
Gjatë fjalës së tij në takimin e organizuar nga “THE ECONOMIST” në Athinë , kreu i qeverisë shqiptare pohoi se hendeqet e së shkuarës duhet të mbyllen.
“Në Ballkanin Perëndimor prej kohësh jemi përfshirë në një bashkëpunim, në paqëtim. Mendoj se edhe pse ka çështje të tilla, si çështja e Kosovës, mosnjohja nga Serbia, ne kemi qenë në gjendje të ulemi dhe të diskutojmë të ardhmen tonë bashkë. Këto janë kohë të veçanta, pasi jemi goditur si të gjithë nga kjo pandemi. Dhe sipas parashikimeve të Organizatave ndërkombëtare, rajoni ynë do të jetë më i godituri fort. Besoj se ka potencial për të çliruar dhe për të ecur përpara, për të mbyllur hendeqet e së shkuarës.”, u shpreh Rama.
Sipas kryeministrit shqiptar, mosmarrëveshjet zgjidhen me dialog, dhe për ta ilustruar këtë, iu referua arritjes së marrëveshjes mes Greqisë dhe Maqedonisë së Veriut.
“Mendoj që lajmi më i mirë është se mosmarrëveshjet mund të zgjidhen së bashku dhe dialogu është i vetmi instrument. Një nga shembujt më të jashtëzakonshëm të kësaj kohe është zgjidhja mes Greqisë dhe Maqedonisë së Veriut. Ishte historike dhe një mësim për të gjithë”, tha Rama./Opinion.al
