Kryeministri Edi Rama këtë të enjte nga Vlora tha se do të nisë procesi për të bërë gati qendrën për të rinjtë për të hyrë në fushën e kodimit ku përmes internetit do fitojnë nga 1 mijë euro ditën e parë deri në 10 në varësi të aftësisë së tyre dhe kapacitetit të shërbimeve që kryejnë. Sipas Ramës, kjo është e ardhmja për një pjesë të konsiderueshme të të rinjve që sot janë 14 deri në 19 vjeç, në sensin e punësimit.
“Do kthehet në objekt publik dhe unë bëra një diskutim të gjatë me arkitektë që të jetë një qendër, e cila të ketë disa komponentë, dhe një komponent kryesor të jetë qendra për gjithë proceset IT-së për të rinjtë në mënyrë që ta krijojmë rrjetin me bërthamën e nisur në Tiranë me TUMO-n me Korçën që ka avancuar për ta pasur këtë qendër për të rinjtë tek Biblioteka e re. Me Vlorën kemi një aset fantastik që mund të transformohet dhe t’u japim mundësi të rinjve që të kenë akses tek ky aktivitet me procese ultrainovative trajnimi, e aktorë që i kemi në kontakt dhe të hyjmë në botën e kodimit dhe të gjithë shërbimeve globale online që u japin mundësinë që pa lëvizur fare nga vendi, pa lëvizur nga Vlora të jenë të punësuar në treguan global me kompjuterin e tyre dhe mund të kenë paga që shkojnë nga 1 mijë Euro në ditën e parë deri në 5, 6, 9,10 (mijë Euro) në varësi nga aftësia dhe nga kapaciteti i shërbimeve që kryejnë. Kjo është e ardhmja dhe për një pjesë të konsiderueshme e atyre që sot janë 14 deri në 19 vjeç në sensin e punësimit”, tha Rama.
Po ashtu, Rama kërkoi që kjo qendër të ketë hapësira edhe për të moshuarit e fëmijët.
“Pastaj përveç kësaj sepse hapësira është fantastike të ketë edhe hapësira për të moshuarit, hapësira për kalamajtë, shërbime publike që janë të përqendruara dhe që ofrojnë mundësira të drejtpërdrejta për qytetarët”, u shpreh ai. /Opinion.al
