Kryeministri i vendit Edi Rama, në takimin ‘Vajzat dhe Gratë Socialiste për Shqipërinë 2030’ u shpreh se “Shqipëria është grua, Evropa është grua dhe suksesi i përpjekjes për Shqipërinë 2030 në BE varet nga motrat, nënat dhe bijat e Shqipërisë.”
Rama falenderoi vajzat dhe gratë për të gjithë mbështetjen e madhe dhe punën e palëkundur që kanë bërë, teksa u shpreh gjithashtu besimplotë se në zgjedhjet e 11 Majit, PS do të jetë fituese dhe se siç tha ai, “Shqipëria më 12 Maj do të gdhihet e mbuluar me rozë”.
Ai theksoi se nënat, gratë dhe bijat tona, janë suksesi kryesor i Shqipërisë për anëtarësimin në Bashkimin Evropian.
”Nuk ka asgjë që më bën më shumë krenar se sa fakti që kjo forcë mbështetet fuqimisht nga gratë. PS e mbështesin në rang kombëtar 56% e zgjedhëseve gra dhe vajza ndërsa në qarqe të caktuara kjo shkon në 65%. Kjo do të thotë që tek burrat dhe djemtë mbështetja është më e ulët.
Mbështetjen kuptimplotë dhe inkurajuese të pjesës më të ndjeshme, më të arsyeshme, sakrifikuese të popullit shqiptar që janë gratë dhe vajzat nuk do ta ndroja kurrë me mbështetjen e pjesës tjetër, mbështetjen e burrave dhe të djemve, të cilën e çmoj shumë. Nuk ka asnjë diskutim që mes dy palëve zgjedh të parat nënat, bijat dhe motrat dhe jo për një as për dy arsye, por për më shumë dhe prandaj sot nuk mund ta nisnim këtë etapë të fundit drejt finishit të 11 Majt përveçse këtu dhe kështu me gratë dhe vajzat që duke e njohur nga brenda organizimin e PS meritojnë të quhen komandot e armatës sonë në të gjitha qarqet që koordinojnë veprimtaritë e skuadrës, brenda dhe jashtë Shqipërisë. Ju falenderoj të gjitha ju këtu në sallë dhe të gjithave në 11 sallat e tjera dhe ju çoj një përqafim.
Ai flamur që ju keni qëndisur me shumë durim, zonë më zonë e qendër votimi me qendër votimi do ta mbulojë të gjithë hartën elektorale dhe në mëngjesin e 12 Majit Shqipëria do të gdhihet e mbuluar me rozë që është ngjyra e grave dhe vajzave, por që është edhe ngjyra e Partisë socialiste të Shqipërisë. Nuk janë sot rastësisht të ndërlidhura kaq shumë me njëra-tjetrën. Kjo është një sinergji shumë domethënëse sepse ka nisur që 20 vjet më parë kur i sapozgjedhur shkoja vizitoja organizata”, u shpreh Rama.
Ndër të tjera Rama ka kujtuar edhe fillimet e tij në parti ku prania e grave ishte shumë e ulët në parti.
“Nuk kishte asnjë grua dhe asnjë vajzë dhe ajo që e bënte dëshpëruees takimin e këtij lloji ishte përgjigja e pyetjes time se pse nuk ka asnjë grua këtu. Po ku ka gra këtu tek ne. Ndërkohë në atë kohë Parlamenti nxinte nga burrat kurse qeveria e sapoformuar kishte vetëm një grua dhe këtu në parti nisi një revolucion gjinor që u shtri jashtë kësaj partie, por duke rritur sistematikisht vendimmarrjen e grave”, tha Rama.
