Kryeministri Edi Rama ka qenë sot në Kukës, ku gjatë takimit me banorët ka zyrtarizuar kandidaturën e Safet Gjicit për zgjedhjet lokale.
“Kandidatin për kryetarin e Bashkisë nuk e sollëm ne, por e gjetëm midis jush. E gjetëm kampion, ose pretendent për kampion se këtë vit sikur… Por të paktën po nuk fituat kampionatin, fitoni bashkinë. Jemi në kushtet kur i kemi jashtë forme kundërshtarët, sado skuadër e mirë të jesh kur të duhet të luash me një skuadër jashtë forme, është e vështirë. Kur ke kundërshtarin copë-copë, edhe ti vetë shpërqendrohesh”, ka thënë Rama.
Ai ka risjellë në kujtesë edhe problemet me tarifën e Rrugës së Kombit për qytetarët e Kukësit, duke thënë se qeveria gaboi por e rëndësishme është që reflektoi.
“Dua të kujtoj një moment kritik me Kukësin, kur u vendos tarifa e rrugës. Në fakt ne ishim gabim, ju kishit të drejtë. Ajo që ka rëndësi, deri dje Kukësi dhe Shqipëria kishin një qeveri që gabonte shumë, mendonte pak dhe nuk reflektonte kurrë. Sot, ne jemi qeveri që gabon herë pas here, mendon shumë dhe reflekton kur gabon. Ne nuk jemi të rënë nga qielli. Gabimi jonë futi në siklet një komunitet të tërë, por ne jemi të vetëdijshëm për faktin që gabojnë dhe jemi këmbëngulës për t’i dhënë njerëzve të drejtën e tyre”, tha Edi Rama./Opinion.al
