Qeveria Rama është mbledhur në Kukës dhe prej andej Rama ka premtuar se aeroportin, një premtim i pambajtur ky prej disa vitesh si dhe një pistë të re për ski në Shishtavec.
Rama në Kukës:
Aeroporti ekzistues do të transformohet tërësisht në një aeroport të standardeve ndërkombëtare, për fluturimet me çmime të ulëta. Studimi që ne kemi bërë me ekspertë të huaj na ka inkurajuar shumë dhe mua më ka entuziazmuar shumë, sepse të gjitha analizat e bëra sipas metodave profesionale të parashikimit për suksesin e një biznesi, tregojnë se aeroporti i Kukësit do të lëvizë në një mesatare prej 300 000 udhëtarësh në vit.
Imagjinojeni vetë se çdo të thotë që 300 000 njerëz të lëvizin përmes Kukësit, për të fluturuar jashtë vendit, apo për të ardhur nga jashtë vendit këtu.
Aeroporti e bën shumë herë më të thjeshtë dhe shumë herë më të mundur që edhe projekti ambicioz i dy djemve nga zona këtu, bashkë me disa investitorë dhe specialistë sllovenë, për ta transformuar Shishtavecin në një destinacion të rëndësishëm turistik për skitë, të kthehet nga një ëndërr në një realitet shumë të prekshëm.
Shishtaveci është pjesë e Programit të 100 Fshatrave dhe agroturizmi, transformimi i shtëpive në bujtina, apo ndërtimi në trojet tuaja, në trojet e njerëzve që jetojnë në zonat malore, i hoteleve të vogla me fermën bashkëngjitur që punon për hotelin dhe për mikpritjen, është një prioritet i yni.
