“Nëse ky vend bëhet, këtë vend e bën vetëm PS”, kështu është shprehur kryeministri i vendit, Edi Rama, gjatë turit të tij të falenderimeve në qarkun e Korçës.
Gjatë fjalës së tij, kryeministri Rama është shprehur se Shqipërinë e bën vetëm Partia Socialiste.
Sipas tij shqiptarët do të gjejnë arsye për të qenë krenarë, për t’u kthyer dhe për të investuar në vendin tonë të ardhmen e tyre.
“Shqipëria është në një kthesë të madhe dhe rezultati i 14 Majit është sfida jonë të jemi forca që e çon këtë vend vetëm përpara. Nëse ky vend bëhet, këtë vend e bën vetëm PS. Nëse nuk e bëjmë ne, askush tjetër nuk e bën dot. Nëse nuk e bëjmë ne sot, ky vend do të lëngojë për shumë kohë. Ne do ta çojmë përpara vizionin e Shqipërisë 2030, ne do ta bëjmë Shqipërinë kampion të rajonit. Shqiptarët do të gjejnë arsye për të qenë krenarë, për t’u kthyer dhe për të investuar këtu të ardhmen e tyre”, tha ai.
Votën e 14 Majit, Kryeministri Rama e sheh si një sfidë dhe një angazhim për të bërë më shumë në 4 vitet e ardhshme.
“E kuptoj votën e 14 Majit si një anagzhim të madh dhe një sfidë të madhe, të cilën duhet ta fitojmë dhe nëse kemi bërë atë që kemi bërë deri tani për Korçën, 4 vitet e ardhshme do të bëjmë akoma më shumë. Nuk mund t’i gjej fjalët për të ju thënë se sa mirënjohës jam në radhë të parë të gjitha grave dhe të gjitha vajzave të të gjithë qarkut të Korçës. Ne jemi partia që votohet më shumë nga gratë dhe nga burrat, ky është vlerësimi ynë më i madh dhe forca jonë më e madhe. Ashtu siç një shtëpi, e mbajnë gratë dhe vajzat, edhe këtë parti e mbajnë gratë dhe vajzat, edhe burrat në këtë parti janë më të mirë”, shtoi Rama./Opinion.al
