Kryeministri Edi Rama nga Nju Jorku ku gjendet për një ekspozitë pikture ka udhëtuar sot për Në Bruksel. Përmes një statusi në facebook ai informon se kishte një mëngjes pune me vendet anëtare, iniciuar nga grupi i Miqve të Shqipërisë në Këshillin e BE-së. Sipas Ramës, në takim është folur me tone pozitive për Raportin e Progresit. Gjithashtu ai thotë se kishte vullnet mbështetjen e rekomandimit pozitiv të Komisionit për çeljen e negociatave per anëtarësimin e Shqipërisë në Bashkimin Europian.
Edhe pse kohët e fundit Shqipëria ka patur një klime të tensionuar politike me Greqinë, Rama thotë se është përgazuar për politikën rajonale që ka ndjekur Shqipëria.
“U nënvizua nga të gjitha vendet anëtare progresi i madh që pasqyrohet në Raportin e Komisionit; ecuria mbresëlënëse e reformave; respekti i veçantë për politikën rajonale të Shqipërisë”, shkruan Kryeministri.
Ndërsa për ligjin e vettingut, ai thotë se “është kusht i natyrshëm për ecurinë e këtij procesi historik”.
Në fund e mbyll me një falenderim për Shefen e Diplomacisë Europiane Federica Mogherini dhe për Komisionerin Johannes Hahn, të cilët i cilëson “dy miq të posaçëm e partnerë të çmuar të Shqipërisë në këtë proces”.
