Kryeministri Rama deklaroi në një video mesazh se opozita ka qenë inekzistente në përballimin e krizës së shkaktuar nga tërmeti.
Teksa fliste për hapat e ndërmarrë nga qeveria pas tërmetit dhe premtimeve për të ardhmen, Rama tha se opozita ka qenë ‘inekzistente’ në këtë proces.
Ai përshëndeti kreun e opozitës, Lulzim Basha “për vetëpërmbajtje në fjalorin e tij” tha Rama por shtoi se nuk mund të mos e kritikonte “për refuzimin për tu ulur në tryezën e bashkëpunimit”.
“Siç e keni parë opozita ka qenë thuajse inekzistente në detyrën e saj përjashto daljet rutinë të Lulzim Bashës të cilin e përshëndes edhe njëherë dashamirësisht për një vetëpërmbajtje në momentet e vështira për njerëzit ku u përpoq të mos bëhej i tepërt me fjalorin e politikës së tij të përditshme por ama nuk mund të mos e kritikoj për refuzimin absurd që ti japë sëbashku me opozitën një dorë në këtë situatë duke u ulur në tryezën e bashkëpunimit.”, tha Rama.
“Refuzimi është mungesë e plotë përgjegjësie”, shtoi kryeministri.
Rama veçoi kreun e opozitës nga aleatët e tij të cilët i akuzoi se kanë nisur një luftë ‘balte’ duke u përpjekur të keqinformojnë njerëzit.
“Opozita, njerëzit rrotull, Lulzim Bashës kanë nisur shenjat e para të një lufte balte për t’ju mërzitur me gënjeshtja shpifje akuza. Kjo është puna e tyre dhe Lulzim Bashës që do ta marrë shpejtë flamurin e asaj lufte. Nuk dua të merrem me ta dhe nuk do të merrem me ta.”, tha ndër të tjera Rama. /Opinion.al
