Kryeministri, Edi Rama i ka bërë mëngjesin e sotëm të gjithë emigrantëve në Greqi, për të marrë zarfet me fletët e votimit të dërguara nga KQZ, t’i plotësojnë dhe t’i nisin drejt Shqipërisë.
Përmes një video në rrjete sociale, teksa tha se ishte rrugës për në takimin me qytetarët e Pogradecit, Devollit dhe Korçës, Rama deklaroi se problemet që u shfaqen në fillim me kompaninë tashmë janë rregulluar dhe të gjithë emigrantët nuk duhet ta lënë pa përdorur mundësinë historike për të qenë votuesit e parë nga jashtë si dhe për të votuar për Shqipërinë në BE.
Rama: Desha të përcjell një thirrje, lutje, mesazh për të gjithë ata që janë regjistruar si votues në Greqi, që të marrin zarfat dhe të mos e lënë pa përdorur mundësinë historike, për një takim me historinë.
Mundësi historike për të qenë votues për herë të parë nga jashtë, por edhe një takim me historinë për të kyçur Shqipërinë në BE. Ka pasur një problematikë për fat të keq në ditët e para me shpërndarjen, por tanimë kompania ka vënë gjerat në vijë.
Zarfat janë shpërndarë dhe keni të gjitha informacionet për të kuptuar se cfarë duhet të bëni dhe për të mos përtuar që ti tërhiqni zarfet nga pikat e shpërndarjes. Në rast se i keni marrë zarfat të veproni duke i kthyer ato drejt Shqipërisë, me numrin 5. Ky votim ka një rëndësi të veçantë për Shqiptarët në Greqi që ende nuk kanë pasaportën dhe janë futur në ankthin e padrejtë të njohjes së pensionit.
Njohja e pensionit bëhet me marrëveshje, negociatat me qeverinë greke kanë nisur, por nuk dimë sa kohë do të marrë. Vullneti ynë është i plotë. Vullneti i qeverisë greke është pozitiv, por duke u nisur nga eksperienca me Italinë që u deshën vite të tëra dhe më pas e solli fati që të më dilte mua një motër në Romë ku u përshpejtuan gjerat, ama që nga dakordësia me motrën deri tek firma e fundit kanë kaluar 1.5 vite. Mund të merret edhe me mend sa mund të zgjasë me Greqinë.
Klithmat e bufit të kënetës u shtrinë edhe jashtë kufijve duke paralajmëruar vjedhjen e madhe. Një nga ato salamandrat blu kishte nxjerrë ca zarfa në rrugë dhe pretendonte se ishin të kapur nuk e di kush dhe sesi. Drejtuesi ynë politik ka bërë të qartë, se zarfa mund të mbledhësh edhe nga shpia jote.
Kur je skllav i bufit edhe shtëpinë tendë e kthen në llogore kënetë. Mund ti fotografosh në rrugë dhe të thuash këto i bëri regjimi, por këto nuk i ha njeri. Ka mundësi të fokusohemi që dhe për këtë arsye një rrugë e dy punë të shtyjmë Shqipërinë përpara dhe të përshpejtojmë tharjen e asaj kënetë që është një fatkeqësi kombëtare dhe një plagë antievropiane.
