Në fjalimin e tij në sheshin “Nënë Tereza”, kryeministri Edi Rama ka thënë se nga sot do të nisë një ofensivë frontale ndaj opozitës. Rama deklaroi se opozita ta harrojë pushtetin në tavolinë.
“Nëse mendojnë se do të detyrojnë ndërkombëtarët të ndërhyjnë t’i hapin rrugën e pushtetit në tavolinë, ta harrojnë”, tha ai.
Rama u shpreh se mazhoranca ka duruar vezët, bojën dhe baltën me shpresën se opozita do të reflektonte, por tashmë gjithçka duket e kotë.
“Sot nis një ofensivë frontale. Kohët e fundit e kemi kafshuar shpesh gjuhën dhe e kemi lënë shpesh të kalojë valën e sulmit të atyre që e kanë bërë Shqipërinë shesh për përshesh, i kemi lënë kur lanë Parlamentin, që e ka zanafillën te ajo Parti që sot ka humbur përfundimisht fillin. I kemi parë që kanë sulmuar qeverinë, duke shpërndarë pamjet e turpshme të dhunës. I kemi parë kur kanë sulmuar Policinë e Shtetit, prokurorët dhe gjykatësit që kalojnë vettingun dhe kanë sulmuar vetë reformën në drejtësi kur dalin jashtë pallatit të drejtësisë shërbëtorët e tyre, kur me një shqipe të varfër kanë sulmuar partnerët e huaj. Nuk ua kemi kthyer sy për sy, as dhëmbë për dhëmbë, kemi marrë frymë thellë e kemi duruar pafund, u kemi ofruar sa kemi mundur bashkëpunim për reformën zgjedhore dhe jo vetëm. U kemi mundësuar të flasin në Parlament më shumë se ne, u kemi duruar bojën, baltën, vezët, mbi fytyrat tona. E gjitha ishte e kotë, në vend të na sfidonin me ide, kanë zgjedhur të na gjuajnë me gurë”, tha kryeministri Rama nga Kongresi i Partisë Socialiste, në sheshin “Nënë Tereza”./Opinion.al
