Nga Desada METAJ-
Sot është dhe afati i fundit i prezantimit të 3 kandidatëve që Shqipëria do të çojë në Gjykatën Ndërkombëtare të Strasburgut. Një proçes i nisur dhe siç duket qartas i përfunduar pa më të voglën transparencë nga qeveria shqiptare. Edhe sot, në afatin e fundit për të çuar emrat në Strasburg, qeveria ka zgjedhur të trafikojë dhe jo të bëjë publike emrat e kandidaturave. Sokol Berberi, Gent Ibrahimi dhe Ina Rama figurojnë zyrtarisht kandidaturat e Shqipërisë në Gjykatën Ndërkombëtare për të Drejtat e Njeriut.
Sokol Berberi mund të jetë një profesionist i mirë, por ai është lakuar shpesh nga opozita si i influencuar nga qeveria pasi është kunati i Fatmir Xhafës. Genti Brahimi është një tjetër kunat i kabinetit qeveritar. I njohur si drejtuesi i grupit të ekspertëve të reformës në drejtësi, ai është dhe kunati i ministres së mbrojtjes Mimi Kodheli.
Por kandidatura e tretë, Ina Rama, është aktualisht juriste në një bankë të nivelit të dytë. Edhe pse emri i saj është i njohur për publikun si ish-kryeprokurore,në drejtimin e institucionit të akuzës zonjës Rama iu rrëzuan 3 nga çështjet më të nxehta. Dosja e Gërdecit, ajo e rrugës Durrës -Kukës dhe 21 janari. Çështje në fakt që çdo prokuror i zoti do kishte dashur ti kishte në dorë jo vetëm për të vënë në vend drejtësinë por dhe për të lënë gjurmë në një vend ku çështje të tilla përfundojnë në trajtime dhe gjykime për akuza banale apo për procedurë.
Por deri sa arriti në këto kandidatura qeveria shqiptare e tejkaloi krejtësisht transparencën duke lënë jashtë dhe institucionin që Këshilli i Eurpës cakton si institucionin përgjegjës për përzgjedhjen, Ministrinë e Drejtësisë.
Opinion.al ishte i pari që publikoi debatet që ishin zhvilluar në mbledhjen e qeverisë për procedurën e munguar të procesit të përzgjedhjes së kandidaturave. Edhe PD reagoi për këtë fakt por e vetmja transparencë e qeverisë ishte publikimi i një liste të gjatë emrash në një portal që për fat të mirë apo të keq mban emrin “transparencë”. E nëse transparenca ka munguar qartas, pyetja që lind është pse pikërisht këta emra dhe kë nga këta do mbështesë më fort qeveria e Edi Ramës?
Proçedura zyrtare në Strasburg parashikon një intervistë me secilin nga kandidatët ose ndryshe nje vetting profesional e më tej është votimi politik në Asamblenë Parlamentare të Këshillit të Europës ai që do të vendosë për emrin fitues.
Këtu hyn në lojë influenca politike e qeverisë shqiptare. Kë do të mbështesë Edi Rama për të përfaqësuar Shqipërinë në Gjykatën e Strasburgut? A do të jenë lidhjet familjare të bashkëpuntorëve të tij ato që do të ndikojnë? Apo ndoshta ndonjë detyrim i hershëm ndaj zonjës Rama, që nuk e morri kurrë në pyetje pranë zyrave të saj kryeministrin edhe kur ky i fundit publikisht deklaroi se ishte i gatshëm të hetohej për organizimin e protestës së 21 janarit. Si do që të zgjedhë, e qartë është që në Strasburg do të shkojë një jurist i afërt me kryeministrin. Dhe jo se ky është nje fenomen i pandodhur më parë në Shqipëri. Madje me gjasa nuk do jetë as i fundit.
E vetmja që këtë herë bie në sy është mbajtja e fshehtë e emrave, për arsye që Edi Rama apo ndonjë bashkëpunëtor i afërt i tij i dinë më mirë. Sido te jetë dhe sado pak a shumë rëndësi të ketë përfaqësimi ynë në Strasburg, përzgjedhjet e Edi Ramës tregojnë qartas mungesë standarti dhe etike, në mos detyrime të pashlyera për ndere të bëra në ditë të vështira frike.
*Desada METAJ- Kryeredaktore e “Opinion”
Të lidhura- Raportimet ekskluzive të Opinion.al:
