“Përgjigjia ime” është rubrika më e re me të cilën kryeministri Edi Rama vjen në kanalin e tij në fb, ERTV. Kryeministri ka zgjedhur të hapë siparin e kësaj rubrike me Genc Sejkon, njeriu që shkund internetin me krijimet e tij, foto-montazhet po ashtu. I profilizuar në një oponencë të fortë me qeverinë, Genc Sejko mund të quhet Njeriu i Memeve në Shqipëri.
Me një ironi për t’u admiruar, një sens humori që gjendet shumë rrallë dhe me një sy kritik të fortë, krijuesi i këtyre memeve, ka detyruar kryeministrin Edi Rama t’i kthejë përgjigje komentit të tij, lidhur me vizitën e Ramës në familjen e Hysen Zhupanit në Shijak, e cila jetonte në varfëri ekstreme. Ai e akuzonte kryeministrin se po bën show me mjerimin e qytetarëve shqiptarë.
Genc Sejko: Mjerë ata që të falenderojnë dhe nuk dinë se ti je përgjegjës direkt për gjendjen e tyre. Ke 5 vjet në pushtet, çfarë ke bërë për të luftuar skamjen? Asgjë! Për ti treguar se po bën shtet, shtëpive që po rrënohen nga varfëria ke shkuar e i ke ngulur sahatin e dritave. Më pas i hoqe ndihmën sociale dhe lekët e kursyera ja shpërndave oligarkëve të tu.Dikujt tjetër do ti vinte turp por ty nuk të bën përshtypje. Ti bën show dhe me mjerimin. Je kryeministër i vendit, nuk je “Fundjava Ndryshe”.
Në replikë, Rama shprehet: “Nëse unë do të isha përgjegjës për gjendjen e tyre do të ishte shumë e thjeshtë por fatkeqësisht kjo është ti biesh me sëpatë fijes së logjikës më elementare.Nuk ka asnjë fakt, asnjë shifër, asnjë provë që të tregojë se në një fushë Shqipëria është më keq seç ishte 5 vjet më parë, përkundrazi.Natyrisht ka njerëz si Hyseni dhe familja e tij apo dhe të tjerë që nuk janë më mirë se 5 vjet më parë por njësoj. Aty ku sëpata juaj e këput fillin e logjikës është kur thua se këtë gjendje e solli sahati i dritave. Jo i dashur. Këtë gjendje e kishte krijuar mungesa e sahatit, mungesa e shtetit për të gjithë dhe e rregullave për të gjithë. Ka më pak varfëri aty ku ka shtet dhe më shumë rregull.
Ti gënjen pa dashje kur thua se unë u hoqa ndihmën sociale familjeve si Hysenit se në fakt krejt e kundërta ëhstë e vërtetë. Mësoje që falë reformës sime janë sot më shumë se 10 mijë familje të varfra e morën ndihmën për herë të parë dhe më shumë se dyfishi i tyre që e merrnin padrejtësisht nuk e marrin më. Thua se lekët e kursyera ua shpërndava oligarkëve. Hej Genc, pak logjikë mik, është krej qesharake dhe nuk mbështetet në asnjë lloj filli arsyetimi dhe jo më në ndonjë fakt. Sa për turp, jo jo nuk më vjen turp të shkoj në shtëpinë e Hysenit se i kisha dhënë fjalën. Ti thua show, por për mua nuk ka pikë rëndësi çfarë thua ti por çfarë mendon Hyseni, zonja dhe fëmijët e tij”.
Menjëherë, pas përgjigjes së kryeministrit Edi Rama në Facebook, ka ardhur edhe reagimi i Sejkos. Ashtu siç mund edhe të pritej, me nota ironike, ai shkruan se kryeministri e mori mundimin për t’iu përgjigjur me video komentit të tij dhe për këtë arsye minimumi i asaj se çfarë mund të bënte, do të ishte publikimi në faqen e tij të Facebook-ut, duke e bërë reagimin e kryeministrit pjesë të dhjetra e dhjetra krijimeve të tij.
“Në video përgjigjen e km do shikoni se si ai qëllimisht shtrembëron atë që unë kam shkruar. Megjithatë, po ju a lë t’a gjykoni vetë“, – citohet nga komenti i tij në Facebook.
Disa nga MEMET dhe krijimet më virale në rrjet realizuar nga Genc Sejko:
Sulmi me armë ndaj banesës së prindërve të gazetarës së kronikës, Klodiana Lala, nuk mund t’i shpëtonte lupës së Sejkos, një revoltë e shprehur aq bukur dhe me një ironi po aq të thellë.
