Shqipëria do të çelë grupkapitullin e dytë të negociatave me Bashkimin Europian – “Tregu i Brendshëm”, në Konferencën e katërt ndërqeveritare Shqipëri – BE, e cila do të mbahet ditën e sotme në Luksemburg.
Në një deklaratë për mediat me Presidentin e Këshillit EuropianAntonio Costa, kryeministri Edi Rama u shpreh se Shqipëria është e përkushtuar për të përmbushur detyrimet dhe mbyllur të gjitha negociatat brenda 2027.
“Bruksel – Me Presidentin e Këshillit Europian, Antonio Costa, për të diskutuar progresin e bërë në procesin e negociatave (sot hapim një tjetër grupkapitujsh në Konferencën IV Ndërqeveritare), si edhe për përgatitjet e Samitit të Komunitetit Politik Europian më 16 maj, e natyrisht edhe për situatën në rajon, ku Presidenti do të bëjë vizitën e tij të parë zyrtare në vigjilje të këtij Samiti”, tha Rama.
