Kryeministri Rama po mban konferencën e përbashkët me Presidentin francez Emmanuel Macron. Rama gjatë fjalës së tij u shpreh se është një privilegj i madh që Shqipëria mikpriti komunitetin politik europian.
‘Ndjesi e jashtëzakonshme qe presidenti francez në një kohë kaq të shkurtër viziton Tiranën sërish. Na jep shumë krenari për këtë shtysë të fortë që marrëdhënia e Francës me Shqipërinë ka hyrë në një fazë të re dhe të panjohur më parë. Është një privilegj i veçantë që Shqipëria mikpriti komunitetin politik europian dhe që së bashku me presidentin dhe një grup vendesh e kemi shtyrë këtë projekt në pikën ku tanimë ka konsensus të plotë nga të gjithë dhe po krijohet një substancë në marrëdhëniet mes vendeve europiane’, u shpreh Rama.
Ai theksoi se pas një sërë projektesh, tanimë Shqipëria e Franca do fuqizojnë bashkëpunimin sidomos në fushën e inovacionit.
“Kjo vizitë bilaterale pas samitit na jep shumë krenari dhe mirënjohje për këtë shtysë të fortë në marrëdhëniet me Shqipërinë që kanë hyrë në një fazë krejtësisht të re e të panjohur më parë. Falë këtij bashkëpunimi ne kemi krijuar rrugët për të sjellë ekselencën franceze në Shqipëri, dje ndezëm dritën jeshile të shkollës franceze që ka marrë mbi 2 mijë aplikime e jam i bindur që do shtohen sepse akoma informacioni për këtë shkollë inovative nuk është përhapur gjithandej. Kemi ecur me projektin e Liceut Francez, ku do shtohet një hapësirë e re. Po ashtu, ne kemi në Shqipëri shumë aktive agjencinë franceze të zhvillimit, që hyri në Shqipëri me nxitjen e Presidentit për të ndihmuar vendin tonë në procesin e rindërtimit pas tërmetit dhe ka bërë një punë të jashtëzakonshme në Durrës me ujësjellësin dhe është këtu për të mbështetur projekte të tjera qëe prekin energjinë e rinovueshme dhe turizmin e qëndrueshëm.”
