Kreu i opozitës Lulzim Basha ka deklaruar sot se të gjithë raportet ndërkombëtare identifikojnë korrupsionin qeveritar si shkakun kryesor të varfërisë në Shqipëri.
Përmes një postimi në Facebook, Basha tregon me anë të një video-mesazhi pjesë nga raportet e organizatave të ndryshme
“Shqipëria është një nga vendet më të korruptuara në Ballkanin Perëndimor. Qeveria u bën presion investitorëve të huaj për të marrë nënkontraktorë kompani të lidhura me qeverinë” citon Basha raportin e Departamentit Amerikan të Shtetit.
“Korrupsioni është kthyer në një problem madhor sa i takon pastrimit të parave në Shqipëri. Rritja e pastrimit të parave lidhet me trafikun e lëndëve narkotike, krimin, evazionin fiskal dhe korrupsionin” citon kreu i PD raportin e Moneyval.
Sa i përket praktikave të kontraktimeve me PPP, Basha citon raportin e Fondit Monetar Ndërkombëtar ku thuhet “Nënkontraktimi i 200 projekteve PPP nga qeveria dhe mospërfshirja siç duhet në llogaritjen e borxhit përbëjnë rrezik për buxhetin”. Gjithashtu ai përmend edhe pjesë të raportit të BE ku veçon pjesën “Mbështetja e qeverisë me projekte PPP sjell rreziqe të mëdha fiskale”
“Që të zhvillojmë ekonominë dhe të marrim investime, duhet të largojmë hajdutin psiqik dhe bandën e tij” mbyll Basha postimin e tij. /Opinion.al
