Kryeministri Edi Rama, ka mbyllur fushatën zgjedhore të partisë socialiste në qytetin e Durrësit.
Takim, i cili për kryeministrin Rama është më i jashtëzakonshmi që ka pasur ndonjëherë në këtë qytet.
Mes falenderimeve të mbështetësve të Partisë Socialiste, Rama theksoi se Durrësi do jetë lokomotiva e zhvillimit ekonomik e të gjithë Shqipërisë.
Ai tha se pas shumë përpjekjesh, Durrësi do të rikthehet se s’bën në atë që ka qenë, në portën kryesore të Adriatikut, kjo gjë sipas Ramës do të arrihet me portin e ri turistik, me atë tregtar dhe hekurudhën e re.
“Në kujtesën time ku është takimi më i madh më i jashtëzakonshëm që kam pasur këtu. Patën edhe debate me drejtuesit e partisë kur u thashë se kjo maratonë fundin e saj do e ketë në Durrës. Dhe e merrni me mend se sa kanë kërkuar që të bëhet në vende të tjera, duke menduar se do ketë më shumë njerëz se në Durrës. Se të gjithë mendojnë se durrsakët nuk janë të takimeve të mëdha. Mirëpo jam i bindur se të gjithë ata që po ndjekin këtë takim, nuk po e besojnë dot që po ndodh në Durrës. Jam shumë mirënjohës për këtë gjë, është privilegj që jam deputet i Durrësit, por është privilegj të jem pjesë e historisë së PS-së këtu në Durrës.
Dua t’u bëj një përshëndetje anëtarëve të Këshillit Bashkiak, drejtuesit të PS-së n Durrës. U bëj një përshëndetje patronazhistëve t frikshëm të Durrësit. Të gjithë zgjedhësve të PS-së në Durrës. Dua t’i bëj një përshëndetje kryetares së bashkisë që ka cilësinë e paparë që t’i fshehë emocionet më shumë se çdokush tjetër që unë kam parë në jetën politike.
Jam i bindur se Durrësi është lokomotiva e zhvillimit ekonomik të Shqipërisë. Është kthyer në qendrën e gravitetit të një hapi tjetër, të një momenti tjetër të historisë së zhvillimit ekonomik. Pas shumë përpjekjesh është vendosur baza, kështu me portin e ri turistik, me atë tregtar, me hekurudhën e re, Durrësi do të rikthehet se s’bën në atë që ka qenë, në portën kryesore të Adriatikut”, u shpreh kryeministri./Opinion.al
