Kryeministri Edi Rama refuzon të takojë kundërshtarët e ligjit të plehrave por organizon një takim ‘live’ në TV me përfaqësues të shoqatës së ricikluesve të cilët janë palë me qeverinë në këtë ligj. Ndër të tjera ai tha se importi i plehrave është aq i rëndësishëm sa importi i miellit…
Rama e nisi duke bërë krahashimin mes dy ligjeve atij të propozuar nga PD-ja 6 vite më parë dhe ligji që mazhoranca e majtë miratoi 5 ditë më parë në parlament.
“Së pari, ligji që ne anuluam ishte një ligj që krijonte hapësirë për import plehrash për djegie apo groposje, pra mbeturina të pariciklueshme; së dyti lejonte liçencimin e çdo lloj subjekti kërkues për import mbetjesh; së treti, aplikohej në një kontekst krejtësisht të paqëndrueshëm”, ka thënë Rama.
Sipas tij, “ligji i ri në thelb ka vetëm një ndryshim në raport me industrinë e riciklimit, ai i njeh të drejtën të gjithë subjekteve që kanë struktura industriale riciklimi të blejnë mbetje të gjelbërta dhe t’i importojnë ato”.
“Kaq, ky është thelbi, të tjerat janë spekulime”, ka thënë Rama. Ai ka theksuar se, para se të miratohej ligji i ri, Shqipëria ishte i vetmi vend në Ballkan dhe Europë që nuk u njihte fabrikave vendase të industrisë së lehtë të riciklimit të drejtën e blerjes së lëndës bazë dhe të importimit të saj.
Ai ka sqaruar se, “Europa i shet këto mbetje sepse janë mbetje që riciklohen dhe kthehen në treg” dhe ka nënvizuar se për ngritjen e strukturave ricikluese janë investuar 273 milionë euro.
