Kryeministri i Shqipërisë, Edi Rama, të enjten, takoi në Ministrinë e Arsimit rektorët dhe dekanët në lidhje me 8 kërkesat e propozuar nga studentët protestues.
Ky takim vjen pas refuzimit të vazhdueshëm të studentëve protestues për t’u futur në dialog me qeverinë për realizimin e kërkesave të tyre.
Kryeministri Rama u shpreh se autonomia e universiteteve është kthyer në arratisje nga përgjegjësia e universiteteve, duke shtuar më pas se mbase duhet ta rishikojmë autonominë e universiteteve.
“Mbase ka qenë një hap i nxituar”,- tha Rama.
Kreu i qeverisë tha se e ka të pamundur të kuptojë se si është e mundur që Universiteti i Tiranës harxhon 6 milionë euro për roje sigurie dhe 0 euro për kërkime shkencore.
“Nëse deri sot kam thënë se jam i gatshëm të marr përgjegjësitë e mia, jam i gatshëm ta pranoj atë pjesë të shuplakës mbi qeverinë, pasi kam besuar më shumë tek autonomia universitare, sot nuk jam më i gatshëm,- u shpreh kryeministri.
Rama: Po ndodh diçka e pandodhur. Është hera e parë që një protestë studentësh mbahet gjallë duke refuzuar zgjidhjen. Dhe kjo nuk është mister dhe s’ka as nevojë të jesh politolog ta kuptosh se kush e ka mbjellë këtë farë. Pjesa më e madhe e studentëve që dolën, presin zgjidhje me të drejtë, a nuk e meritojnë vallë një reflektim? Ajo që ka kërkuar lëvizja studentore e 90-ës ishte dialogu. A nuk meriton një reflektim kjo, se deri ku i kemi lënë ne studentët dhe cili është kuptimi i tyre i demokracisë? Mendimi i universiteteve është i rëndësishëm. Pedagogët disa janë fshehur, disa janë nën akuzë…Unë i kam ‘po’ të gjitha pikat, por kam nevojë për ‘si’.
