Kryeministri Rama deklaroi se nëse hapen listat e kandidatëve për deputetë, nuk mund të ketë më koalicione parazgjedhore.
Rama mori si shembull vendet europiane të cilat nuk lejojnë koalicionet dhe tha se vetëm në Shqipëri ka koalicione ku vota e një partia numërohet dhe i jep deputet një partie tjetër.
Më tej ai thotë se edhe për këtë ka një zgjidhje, pasi subjektet mund të arrijnë marrëveshje për të dalë me një subjekt unikal brenda një liste të përbashkët.
“Listat e hapura e bëjnë të pamundur mbajtjen e koalicioneve. Do të bënin të pamundur votimin, me fletë kilometrike. Kemi Holandën që ndalon çdo formë koalicioni. Kemi shumë vende që subjektet bashkohen në një listë.
Nuk kemi asnjë vend, përveç vetes që një mullar i madh me parti ku shumicën e tyre nuk e ka dëgjuar askush, futen në një tren të madh, përfitojnë nga buxheti i shtetit dhe bëjnë që qytetari të votojë për njërin dhe votën ta marri tjetri. Por kjo nuk do të thotë që të pengojmë që subjektet të bëjnë marrëveshjet e tyre dhe të kenë subjekt unikal.”, u shpreh Rama./Opinion.al
