Kryeministri Rama deklaroi në një konferencë të përbashkët me drejtorin ekzekutiv të “Turkish Airlines” se do të bëhet realitet një linjë ajrore shqiptare.
“Një linje e re ajrore ka nisur falë mbështetjes së Presidentit turk Erdogan dhe me asistencën teknike të Turkish Arirlines. Jemi të vetëdijshëm se cilësia e shërbimit të transportit ajror të shqiptareve që lëvizin jashtë atdheut edhe kur kthehen në atdhe lë për të dëshiruar”, tha Rama.
Sipas tij pakënaqësitë nuk janë për kompanitë e mëdha që operojnë në Shqipëri por për shërbimin që iu jepet njerëzve në shume drejtime, me një cilësi dhe kosto bilete që lë për të dëshiruar.
“Ka qenë objektivi ynë për ngritjen e një linje ajrore shqiptare. I jam mirënjohës Presidentit të Turqisë por edhe drejtuesit ekzekutiv të Turkish Airlines qe po na japin një ndihmë të vyer, jemi afër finalizimit te projektit.
Jemi shpresëplotë që në harkun kohor të këtij viti do të nisin fluturimet e para. Nuk dua të flas për datat dhe afate, por me asistencë do të shtrijmë të gjithë spektrin e shërbimit për kompaninë e re shqiptare. Ne do të bëjmë realitet një linje ajrore shqiptare me flamurin tonë, ku do të shëbehet me të njëjtën cilësi siç shërbehet te Turkish Airlines”, vijoi Kryeministri.
