Profili i Edi Ramës në Facebook këto ditë i ngjan një fytyre që ia kanë skuqur mirë faqet me shuplaka. Ai del me Lal Qazimin në Elbasan, ndjekësit i kujtojnë plehrat. Poston një foto te vjetër në Amarcord, e akuzojnë për plehrat. Shpik nje grafik se çfarë mbetjesh do importohen, sulmet i shtohen. Del me Merkelin në foto, ndjekësit i kujtojnë premtimet kur ishte në opozitë.
Që nga e enjtja, profili i Edi Ramës në Facebook u kthye në tabelë qitjeje, per mijëra vetë, qe shfryjnë mllefin dhe i kërkojnë llogari për plehrat. Në fillim ka menduar se çudia më e madhe tre ditë zgjat. Jemi në Shqipëri. Mavijosjen në fytyrë, urdhëroi t’ia trukonin nëpunësit e kryeministrisë. Puna për të fshirë komentet negative bëhej me tre turne. Mediat online e demaskuan menjëherë. Zgjidhja që i dha problemit, e bënte të dukej si frikacak me ndjekësit e tij në Facebook, shumica votues socialistë. Tre vite më parë, kur përmendte shuplakat e tyre, Rama vinte dorën në zemër dhe buzëqeshte mirënjohës, para se të lëshonte pastaj fpremtime për mrekullitë e Rilindjes. Kur pa se fshirja e komenteve e shtoi valën e inatit, kryeministri vendosi t’i kthejë përgjigje ndjekësve të tij. Pavarësisht se përgjigjet ndaj komenteve janë të ngjashme, Rama duket se merret personalisht me këtë punë. E pranon vetë në një koment që nuk është administratori i profilit që shkruan. “Ndersa ty, Lendri, te siguroj se nuk eshte administratori dhe permbajtja e opinionit tim eshte e njejta, kur edhe frika juaj nga mosinformimi shprehet njesoj, plehrat, plehrat, plehrat…” shkruan Rama.
Përgjigja është shkruar gjatë kohës kur kryeministri ishte në Vjenë, në takim me kancelaren Merkel, Presidentin e Këshillit të Europës, Donald Tusk dhe me kryeministra të rajonit.
Shikojeni videon më poshtë. Krerët e shteteve po përshëndeten me njëri tjetrin para se të nisë biseda, për të cilën janë mbledhur. Vetëm Edi Rama, ulur në një cep të tavolinës, nuk e ka mendjen. Shkruan në celular, mospërfillës dhe me nxitim. Ka habitur edhe Viktor Orbanin, kryeministrin e Hungarisë, që normalisht nuk ia di hallin.
Duket një mision i pamundur të përballesh i vetëm me gjithë këtë mllef që kanë sot qytetarët për importin e plehrave. Edi Rama nuk ka zgjedhur arrogancën e zakonshme kësaj radhe, sepse e di se zgjedhjet janë vetëm 9 muaj larg. Di gjithashtu që ata që i hakërrehen, që ia shkruajnë emrin në kazanët e plehrave dhe që nuk kanë frikë ta kundërshtojnë ballë për ballë, nuk janë vetëm militantët e thekur të PS. Janë qytetarë që nuk e kanë jetën të lidhur me Rilindjen, janë ata që identifikohen si elektorat i pavendosur, që shuplakat nuk ia kursejnë as PS, kur kjo i zhgënjen. Ndaj Edi Rama sot po i përgjigjet të gjithëve, i ndërgjegjshëm për gënjeshtrën e trashë që mbart arsyetimi i tij, por larg arrogances me të cilë ka qeverisur tre vitet e fundit. Ka marrë celularin dhe vazhdon të shkruajë koment pas komenti, me fytyrën e skuqur nga shuplakat, pa e vrarë mendjen nëse ka afër Merkelin, Vuçiçin apo Donald Tuskun dhe me shpresën se do t’ia falin gënjeshtrën për hir të përulësisë dhe konfidencës që po i tregon njerëzve në rrjetet sociale/ Lapsi.al
