Aktualitet

Rama: Kriza energjetike na pret, BE të mos përsërisë turpin e pandemisë



Bëhu pjesë e Grupit Zyrtar të Opinion.al
>> KËTU <<
               Publikuar në : 13:42 - 02/09/22 |
Opi Nion

Ka nisur konferenca për mediat e tre liderëve të Ballkanit, kryeministrit Edi Rama, presidentit të Serbisë Aleksandër Vuçiç dhe kryeministrit të Maqedonisë së Veriut, Dimitar Kovaçeski në kuadër të Ballkanit të Hapur.

Gjatë fjalës së tij kryeministri Rama u ndal te kriza energjetike dhe i bëri thirrje BE të ndihmojë Ballkanin duke mos bërë të njëjtin gabim siç bëri me vaksinat gjatë pandemisë.

“Ky dimër ka gjasë të jetë dimri më i vështirë që kemi hasur në gjithë këto vite dhe këtu në Ballkan nuk është se kemi pasur dimra të lehtë. Sot që flasim në Kosovë ka orë të tëra ndërprerje energjie. Ky është fakt. Ndërkohë edhe në vende si Britania, Franca, Gjermania po paraqiten plane shkurtimesh të energjisë elektrike. Plane që përfshijnë fikjen e dritave pas orës 22:00 në rrugë, vitrina të dyqaneve, që do thotë mbyllje të çdo aktiviteti, restorantesh, baresh, klubesh për të kursyer energji. Ndërkohë kemi diskutuar çfarë po na kushton mosçuarja e kësaj krize mbi shpatullat e qytetarvë. Kjo është një nga marrëveshjet që kemi bërë sot, është konkrete për të marrë hapa konkretë. Në Shqipëri kemi marrë një vendim për të mos e prekur çmimin e energjisë elektrike për konsumatorin familjar dhe biznesin e vogël dhe sot vazhdojmë kemi të njëjtin çmim siç kemi pasur përpara se të shfaqej kriza. Por kjo do të thotë qindra miliona Euro që dalin nga arka e shtetit për të mbuluar shpenzimin, koston. Këtu çështja është sa gjatë do vazhdojë kjo histori. Mund të kesh edhe paratë por mund të mos kesh energjinë për ta blerë. Përfitoj nga rasti që t’ja drejtoj përsëri BE apelin që të mos bëjë me ne turpin që bëri në kohën e pandemisë.

Vendet e Ballkanit u detyruan të vraponin në Kinë, Rusi, Turqi për të filluar operacionin e shpëtimit të infermierëve, mjekëve e të tjerëve me radhë me vaksinim, sepse BE u mbyll dhe pa vetëm brenda mureve të kështjellës së vetë. Ja ku jemi sot, BE është mbledhur dhe po flet për të mbështetur vendet me ekstra fonde për të përballuar këtë çmenduri. Vendet e BE kanë buxhetet e tyre por kanë dhe buxhetin e tyre të BE. Ne do ju drejtohemi dhe me shkrim Brukselit dhe vendeve anëtare, të tre së bashku, për t’i kërkuar të njëjtën gjë për ne, një mbështetje financiare ekstra përveç mbështetjes tonë buxhetore. Parashikimet që ne kemi ndarë për shpenzimet janë marramendëse. Kemi përpara 7 muaj shumë të vështirë. Për Shqipërinë kjo do të thotë afro gjysmë miliardi Euro që do shkojë për të mbajtur sistemin, për të vazhduar furnizimin me energji. Shpresojmë që të na dëgjojnë dhe të mund të jemi dhe ne pjesë e ndarjes së kësaj përgjegjësie”-tha Rama.

Pas