Kolegji i Europës në Tiranë është gati të hapë dyert. Lajmin e bëri të ditur kryeministri Edi Rama, i cili në një postim në rrjetet sociale shkruan se ky kolegj do të presë studentët e parë të përzgjedhur për të ndjekur ciklin e studimeve Master duke filluar nga java e fundit e Gushtit.
Rektorja e Kolegjit të Europës, Federica Mogherini ishte bashkë me ministren Ogerta Manastirliu për të vizituar shtëpinë e parë të kolegjit në godinën “Liria”.
Kryeministri theksoi se paralelisht po punohet për projektin e ri të Kolegjit të Europës, që pritet të nisë zbatimin në vitin 2024 për të garantuar më tepër kapacitete didaktike, ambiente moderne dhe hapësira multifunksionale për studentët dhe profesionistët e rinj.
“Paralelisht, po punohet për projektin e ri të ri të Kolegjit të Europës, i cili pritet të nisë zbatimin brenda vitit 2024, për të garantuar më shumë kapacitete didaktike, ambiente moderne dhe hapësira multifunksionale për studentët dhe profesionistët e rinj. Krenarë që ia dolëm të realizonim në një kohë kaq të shpejtë këtë projekt ambicioz, që i hap rrugën një oferte të re akademike drejt Shqipërisë Europiane 2030”, shkruan Rama.
Kolegji i Evropës një nga institucionet më të vjetra dhe më të respektuara në Evropë i krijuar me qëllimin për të promovuar bashkëpunimin dhe integrimin evropian, ka luajtur rol kyç në ndërtimin e Bashkimit Evropian.
