Kongresi i Partisë Socialiste ku do të zgjidhen edhe strukturat e saj do të mbahet më 29 shkurt.
Kryesia mori sot këtë vendim, ndërkohë që kreu i partisë, Edi Rama tha se po punohet për procesin e zgjedhjes së kryetarit.
“Jemi në proces kandidaturash për kryetarin e partisë, prej disa muajsh jemi në proces riorganizimi, ripërtëritje për zgjedhjet e ardhshme dhe pasi kemi zgjedhur kryetarët e organizatave, pasi kemi përfshirë në proces edhe gratë duke vendosur të zbatojmë një normë të re të organizimit ku drejtimi i organizatave i besohet një burri ose djali, gruaje ose vajze, tani ka ardhur koha të mbyllim procesin për zgjedhjen e kryetarit të Partisë”, u shpreh Rama.
Sa i përket procesit të riorganizimit të strukturave në përgjithësi, kryeministri theksoi se çdo gjë ka ecur sipas normave.
“Kudo procesi ka ecur sipas normave të paracaktuara, diku më shpejt diku më ngadalë por në përgjithësi ky proces na ka dhënë atë që kemi pritur, një energji të re, ripërtëritje të domosdoshme në një fazë të ndërmjetme, edhe pse zgjedhjet duken larg ato janë nesër, sepse qershori është shumë i afërt politiksht.” /Opinion.al
