Kryeministri Edi Rama mëngjesin e sotme ishte i pranishëm në “Forumi Ekonomik i Tiranës”. Gjatë fjalës së tij, Rama u shpreh se duhet të bëhet ndarja mes bizneseve legjitime dhe atyre kriminale, ndërsa shtoi se ka marrë fund koha e hyrjes së krimit në politikë dhe administratë.
“Biznesit të paligjshëm do i themi që ky nuk është vendi i tyre dhe duhet të kalojnë shume veshtiresi, ka ardhur koha ti shkojmë pas atyre seriozisht e të bëjmë të mundur që të gjithë këto gjera negative që kanë bërë me krimin e organizuar duke hyrë në administratë e politikë, kjo kohë ka marrë fund. Të punojmë që bizneset legjitime të kenë një trajtim më të mirë dhe shumë kapacitete për të projektuar për të ardhmen pa u përballur me ngjarje të paparashikueshme të administratës, nga krimi i organizuar e zhvatja. Do arrijmë marrëveshje për një sulm shumë të madh kundër krimit të organizuar duke i kërkuar cdo personi të kërkuar për krime deri tani të provojë që asetet që ai apo ajo ka që vijnë nga biznese legjitime ndryshe asetet do konfiskohen”,-tha Rama.
Kryeministri ka deklaruar gjithashtu se do të ketë transparencë për çdo transaksion që bëjnë bizneset, ndërsa ka theksuar se në masat që do të merren, përfshihen metodat e gjurmimit dhe kërkimit për çdo produkt.
“S’kemi transparencë sa i përket transaksioneve nga biznesi në biznes, ka shumë hije në këtë veprimtari, me fiskalizimin ne do shohim çdo sekondë% të veprimtarive në internet e gjitha do shkojë përmes një truri digjital që do jetë nën monitorimin e administrates fiskale, kjo do parandalojë keqbërjen nga vetë administrata. Hapi i dytë sistemi i gjurmimit dhe kërkimit që do zbatojmë nga produktet e akcizës deri tek ato ushqimore, ujin e pijshëm e barnat. Çdo produkt që do hyjë në treg do gjurmohet, çdo pikë karburanti që del nga rrjeti i shpërndarjes e blehet nga qytetari do gjurmohet, çdo tablet barnash apo produkt që shitet në një supermarket do gjurmohet”,-u shpreh kryeministri./ Opinion.al
