Një ditë pasi Ilir Meta e sulmoi ashpër në një studio televizive, Rama i është kthyer nga Vlora duke deklaruar se koalicioni i PS me LSI ishte një histori pengmarrjeje. Ai tha se partitë e mëdha kanë qenë të detyruara për të bërë koalicion me të vegjlit por më pas këta e kanë kthyer gjithçka në ankand.
Deklarata e plotë e Ramës me peshkatarët në Vlorë
Si mundet dhe institucionet e kulturës të ndahen mes partive? Një ish-polic e bën drejtor muzeu… Na duhet të krijojmë makinerinë administrative që është e shtetit nuk merr urdhra nga partitë. Një drejtor i një agjencie të rëndësishme i thoshte ministres: S’të njoh ty, njoh kryetarin e partisë.
E gjithë kjo është histori pengmarrje: Ose do ta pranosh këtë e të bësh koalicionin ose thotë s’ka problem, iki kam tepsinë tek tjetri.
Dhe dy partitë e mëdha këtu janë bërë pengje të këtij lloj ankandi. Ky është ankand. Çfarë lidhje ka kjo me demokracinë, me shtetin.
Kush më thotë mua se kjo është histori demokratike, i them se demokracia nuk është anarki e pazar.
Demokraci për të pasur sa më shumë kryetar partish në parlament për të kërkuar sa më shumë llokme nga tepsia.
Dalin për të bërë parti që të fusin veten e vet në parlament për të bërë shantazh dhe njerëzit kujtojnë se po çojnë zërin e tyre. Vetëm shantazh, vende pune në dëm të atyre që i votojnë, sepse shumë njerëz nuk e dinë si funksionon dhe votojnë dhe nuk marrin dot një hipotekë.
Nëse na vendosni në kushtet që duhet të bëjmë prapë negociata për drejtoritë nuk ka rrugë tjetër.
Çdo parti e madhe është e detyruar t’i bëjë, nuk ka rrugë tjetër, se ndryshe nuk bën dot qeverinë.
Pra nuk i bën dot reformat që kemi bërë se e vërteta e koalicionit tonë është kjo. Kemi bërë reforma shumë të rëndësishme. Por e vërteta e shtetit tonë prej 91-shit e deri tani është kjo që po ju them unë.
Që edhe ky koalicion që ne ngritëm nuk e preku dot këtë kancer brenda administratës, një kancer i trashëguar në të gjitha administratat dhe i rënduar dhe vetëm rëndohet, kthehet në një art në vetëvete kapja e brendshme e administratës.
